Avstraliyada ötən ay elektrik avtomobillərinin satışı ilk dəfə benzinlə işləyən avtomobilləri üstələyib. Bu dəyişiklik yanacaq qiymətlərinin artması və təmiz avtomobillərin istifadəsini təşviq edən dövlət siyasətinin təsiri ilə sürətlənib.

Avqustda 27 minə yaxın elektrik avtomobili satılıb ki, bu da tək ay üçün yeni rekord olmaqla yeni satışların 24,9 faizini təşkil edir. Bu göstərici həm benzinlə işləyən avtomobilləri (təxminən 26 min ədəd), həm də dizel avtomobilləri (23 min 600 ədəd) qabaqlayıb.

Əgər plug-in hibridlər də nəzərə alınsa, plug-in avtomobillərin payı yeni satışlarda 36 faizə çatır.

Elektrik avtomobillərinin artımı iki əsas səbəbdən baş verib – İran müharibəsi neft qiymətlərinin yüksəlməsinə, nəticədə benzinlə işləyən avtomobillərin istifadə xərclərinin artmasına səbəb olub. Bundan əlavə, ötən il tətbiq olunan federal nəqliyyat vasitələrinin emissiya standartı avtomobil şirkətlərini illik orta emissiyalarını azaltmağa məcbur edib. Bu isə müxtəlif qiymət kateqoriyalarında sıfır və az emissiyalı avtomobil modellərinin sayını əhəmiyyətli dərəcədə artırıb.

Əvvəllər Avstraliya elektrik avtomobillərinin geniş yayılmasında bir çox OECD ölkələrindən geridə qalırdı və bu texnologiya siyasi qorxu kampaniyalarının mövzusu idi. Keçmiş baş nazir Skott Morrison 2019-cu ildə avtomobil emissiya standartının tətbiqini "həftə sonunu bitirmək" kimi xarakterizə etmişdi. Dörd il əvvəl elektrik avtomobillərinin satışı 2 faizdən az idi, ötən il isə təxminən 8 faiz təşkil edib.

İqlim dəyişiklikləri və enerji naziri Kris Bouen elektrik avtomobillərinin satışlarının benzinlə işləyənləri keçməsini "önəmli bir an" adlandırıb.

"Avstraliyalılar qorxu kampaniyalarını görüb keçiblər və daha ucuz işlədilən, daha təmiz, beynəlxalq benzin qiyməti şoklarına daha az məruz qalan avtomobillərə sərmayə qoyurlar," deyə o bildirib.

Avqustda Toyota Avstraliyada ən çox seçilən avtomobil markası olub. Onu Çin mənşəli elektrik avtomobili istehsalçısı BYD və trilyoner İlon Maskın "Tesla" markası izləyib. Ən populyar yeni model "Tesla Model Y" olub, 6 min 400-dən çox satılıb. Top 10 markadan beşi Çin istehsalıdır: BYD, GWM, MG, Geely və Cheery.

Elektrik Avtomobilləri Şurası Avstraliyalıların avtomobil seçimi baxımından “struktur dəyişiklik” baş verdiyini, iqtisadi və ekoloji faydaların bu dəyişikliyi sürətləndirdiyini bildirib.

Şuranın baş direktorunun müavini Culie Delveçio hazırda təxminən 200 elektrik avtomobili modelinin bazarda olduğunu söyləyib: "İndi əsas hədəf elektrik avtomobilinə keçidin faydalarını daha çox insana, o cümlədən regional icmalara, mənzil sakinlərinə və evlərini icarəyə götürən 30 faiz avstraliyalıya çatdırmaqdır," deyə o əlavə edib.

Avstraliya Avtomobil Sənayesi Federal Palatasının baş direktoru Toni Veber istehlakçı seçimi və rəqabətin yeni avtomobil bazarını sürətlə dəyişdirdiyini bildirib. İnfrastrukturun isə bu tempə uyğunlaşmalı olduğunu vurğulayıb.

"Əlçatan və etibarlı şarj infrastrukturu, xüsusən magistral yollar, kənd və regional ərazilərdə, eləcə də evdə şarj imkanından məhrum sürücülər üçün vacib olaraq qalacaq," deyə o bildirib.