Avstraliya İmamlar Şurası silahlı çağırışı qınayıb

The Guardian yazır ki, Avstraliya İslam İmamlar Milli Şurası (ANIC) Melburnda fəaliyyət göstərən xütbəçi Abu Ahmadın iyulda oxuduğu xütbədə müsəlmanların yəhudilər və xristianları dost tutmaması və “düşmənlərə qarşı silaha əl atması” barədə verdiyi açıqlamalardan narahat olduğunu bildirib.

Al Bayyinah İslam Mərkəzinin sosial şəbəkələrdə yayımladığı videoda Abu Ahmad kitabdan oxuduğu hissəni təkrarlayıb və bu sözlərin şəxsi çağırış olmadığını açıqlayıb. O, müsəlmanların sülhsevər qeyri-müsəlmanlara zərər verməsinin qəbul edilməz olduğunu vurğulayıb.

ANIC güclü şəkildə vurğulayıb ki, vətəndaşlara, dini icmalara və Avstraliya xalqına qarşı silahlı çağırışlar qətiyyətlə rədd edilir. Şura qeyd edib ki, məsələni tam öyrənənədək dediklərin konteksti və şəxs barədə qərar verməyəcək.

Şura Avstraliya müsəlmanlarından insan həyatının müqəddəsliyinə hörmətlə yanaşmağı, cəmiyyətə faydalı olmağı tələb edir. Eyni zamanda, bütün dini rəhbər və xütbəçiləri açıqlamalarında məsuliyyətli olmağa çağırıb.

Avstraliyanın Albanese hökuməti dini nifrət təbliğatına qarşı sərt qanun layihəsini dəstəkləyən partiyaların olmaması səbəbindən geri çəkib. Federal müstəqil deputat Allegra Spender isə bu hadisənin daha ciddi nifrət nitqi qanunlarına ehtiyacı göstərdiyini bildirib.