Hollandiya Ticarət Naziri Sjoerd Sjoerdsma bu həftə Vaşinqtona səfər edərək İqtisadiyyat Katibi Havard Lutnik və Konqres üzvləri ilə görüşüb. Görüşün məqsədi Çin çip istehsalçılarının Qərb yarımkeçirici avadanlıqlarına çıxışını qadağan edən MATCH Aktına qarşı çıxdıqlarını bildirmək olub. Bu qanun layihəsi xüsusən "ASML" şirkətinə ciddi zərbə vuracaq.

Hollandiya bazalı "ASML" Avropanın ən dəyərli şirkətidir və qabaqcıl süni intellekt çiplərinin istehsalında istifadə olunan mürəkkəb litografiya maşınlarının dünyada yeganə istehsalçısıdır.

Sjoerdsma görüşlərdən sonra "Bloomberg"ə verdiyi açıqlamada bildirdi: “Konqresdə narahatlıqlarımızı geniş şəkildə müzakirə etmək mənim üçün nadir haldır. Hollandiya üçün risklər çox yüksək ola bilər”.

"ASML" şirkətinin satışlarının 19 faizi Çinə aiddir. MATCH Aktı mövcud məhdudiyyətlərdən daha sərt tədbirlər nəzərdə tutur, şirkətin ən qabaqcıl ekstremal ultrabənövşəyi (EUV) avadanlığına uzun müddətdir tətbiq olunan qadağanı daha genişləndirərək dərin ultrabənövşəyi (DUV) immersiya maşınlarını da Çin bazarından xaric edəcək.

"ASML"-in baş icraçı direktoru Kristofer Fukve may ayında "TechCrunch"a bildirmişdi ki, Çin hal-hazırda 10 il əvvəl ilk dəfə göndərilmiş köhnə nəsil DUV avadanlığını ala bilir, MATCH Aktı isə həmin avadanlığı istifadədən çıxaracaq.

Apreldə təqdim edilən qanun layihəsi hələ tam olaraq Nümayəndələr Palatası və Senatda müzakirəyə çıxarılmayıb; "Bloomberg" qeyd edir ki, keçməsi üçün daha geniş paketə daxil edilməlidir.