Apple patent pozuntusuna görə 5,7 milyard dollar cərimələndi

Al Jazeera yazır ki, Apple şirkəti Taction Technology-nin patent hüquqlarını pozduğuna görə 5,7 milyard dollardan çox cərimə ödəməlidir. Bu, istifadəçilərin bildiriş aldıqda və ya düyməni basdıqda hiss etdiyi haptik vibrasiya texnologiyası ilə bağlıdır.

Kaliforniya Cənub Dairəsi federal məhkəməsində keçirilən iclasda münsiflər heyəti iPhone istehsalçısının San Dieqoda yerləşən Taction şirkətinin iki patentini pozduğunu qərara aldı. Məhkəmə prosesi 2021-ci ildə başlayıb, 2023-cü ildə federal hakim Apple-ın patentləri pozmadığını qərarlaşdırmışdı. Daha sonra apellyasiya məhkəməsi işi yenidən davam etdirdi.

Taction-ın vəkili Lens Yang qərardan sonra bildirib: “Münsiflər heyətinin Taction tərəfinə qərar verməsi və onun patent hüquqlarını təsdiqləməsi bizi sevindirdi.” Şirkət iddia edir ki, Apple Taction-ın innovasiyalarından istifadə edərək patentlərdən icazəsiz faydalanır.

Apple isə cavabında “Apple-ın Taptic Engine texnologiyası Taction-ın texnologiyasından əsaslı dərəcədə fərqlidir və Taction-ın öz testləri bunu təsdiqləyib” bəyan edib. Şirkət qərar üçün apellyasiya şikayəti verməyi planlaşdırır.

Qərar Apple şirkətində rəhbərliyin dəyişdiyi vaxta təsadüf edir. Sentyabrda Tim Kukun yerinə Con Ternus baş direktor vəzifəsini tutub. Bu dəyişiklik Apple-ın süni intellekt məhsullarını bazara çıxarmaqda digər texnologiya şirkətlərindən geri qalması fonunda baş verir.

Apple səhmləri bazar ertəsi günü təxminən iki faiz dəyər itirib.