Aleksandr Novak Rusiyanın dizel yanacağının ABŞ bazarına daxil olacağını bildirib

Rusiyanın dizel yanacağı müqavilələr imzalandıqdan sonra 15-20 gün ərzində ABŞ bazarına daxil olacaq, - deyə Baş nazirin müavini Aleksandr Novak "Vesti"yə müsahibəsində bildirib.

"ABŞ Energetika Nazirliyi müqavilə tərəfləri və alıcı olan şirkətləri müəyyənləşdirib. Hazırda kommersiya şərtləri üzrə danışıqlar gedir, yəni müqavilələrin imzalanması üzrə iş aparılır. Müqavilələr imzalanan kimi yanacaq 15-20 gün ərzində ABŞ bazarına çatdırılacaq. Qonşu digər ölkələrdə isə bu müddət daha qısa olacaq," - Novak deyib.

O bildirib ki, Vladimir Putin və Donald Tramp arasında telefon danışığından və əldə olunan razılıqdan sonra Rusiya hökuməti dizel yanacağının ixracına qoyduğu məhdudiyyətləri ertəsi gün aradan qaldırıb.

"Gələcəkdə, prezidentlərin razılaşdığı kimi, istehsalı mümkün qədər artıracağıq. Bu, oktyabrda 500.000 ton, noyabrda 1 milyon ton, dekabrda isə 1 milyon ton deməkdir. İldə sonuna qədər neft emalı zavodları əvvəlki kimi tam güc ilə işləsə, dünya bazarlarına 3,5 milyon ton təchizat həyata keçirəcəyik. Bu, bütün qlobal bazarın təxminən 10 faizi deməkdir," - Novak söyləyib.

Novak qeyd edib ki, hazırda Rusiya Energetika Nazirliyi ilə ABŞ Energetika Nazirliyi arasında fəal iş aparılır, habelə Rusiya dizel ixrac edən şirkətlərlə ABŞ alıcıları arasında tam əlaqə mövcuddur.