Aİ Ukrayna və digər ölkələr üçün fərdi planlar hazırlayır

News.ru saytına istinadən, Brüssel yeni namizəd ölkələrin qəbulunda universal yanaşmanı dayandırmağı planlaşdırır. Avropa Komissiyası ən perspektivli ölkələr üçün xüsusi yol xəritələri hazırlayır.

Bu sənədlərdə Ukrayna, Moldova, Monteneqro və Albaniya üçün konkret islahat tələbləri və danışıqların mərhələli başa çatma tarixi göstəriləcək. Məqsəd namizəd ölkələrdə daxili islahatları üzvlük danışıqları ilə əlaqələndirməkdir.

Yeni strategiya namizədləri liderlər və geridə qalanlar kimi iki qrupa ayırır. Gürcüstan, Türkiyə və Serbiya bu xüsusi planlara daxil edilmir. Brüsseldən verilən məlumata görə, bu ölkələrdə demokratiya və hüquq dövlətinin inkişafında geri dönüş riski mövcuddur.

Üzvlüyün genişlənməsi məsələsində kursun dəyişməsi geopolitik səbəblərlə bağlıdır. Aİ qorxur ki, inteqrasiya prosesinin uzanması namizədlərdə məyusluq yaradaraq digər təsir mərkəzlərinin möhkəmlənməsinə şərait yaradacaq.

Planlaşdırılır ki, genişlənmə siyasətinə dair ətraflı hesabat oktyabrın 6-da Aİ rəhbərliyinə təqdim olunsun. Bu mövzu oktyabrın 15-də Brüsseldə keçiriləcək sammitin əsas məsələlərindən olacaq.