ABŞ ilk dəfə HACM hipersəsdən raketinin sınağını keçirib

TASS yazır ki, ABŞ Hucum Kruiz Hipersəs Raketinin (HACM) ilk uçuş sınağını Avstraliyadakı Woomera test poliqonunda keçirib.

ABŞ Hərbi Hava Qüvvələrinin hipersəsli raketi Raytheon şirkəti ilə Avstraliya mütəxəssislərinin birgə inkişafıdır və rəsmi məlumatlara görə, artıq uçuş test mərhələsindədir.

HACM proqramı ciddi gecikmələr yaşayıb və Hərbi Hava Qüvvələri testlərin həcmindən ixtisara gedərək, 2027-ci il üçün raketin sürətli tətbiqi və satınalınmasına fokuslanıb.

ABŞ Hərbi Hava Qüvvələrinin nümayəndəsi testlərin uzunmənzilli zərbə imkanlarının inkişafı istiqamətində davam edən əməkdaşlıq çərçivəsində keçirildiyini bildirib, lakin testin dəqiq tarixini açıqlamayıb.

Raketin texniki xüsusiyyətləri açıqlanmır, lakin mətbuat məlumatlarına əsasən, HACM iki mərhələdən ibarətdir: raket gücləndiricisi və sonrakı hədəfə yönələn sürətli kruiz hissəsi.

Raket ən çox 7 Maх sürətinə çata bilir və təxminən 500 kilometr məsafəni qət edə bilir.