ABŞ-ın başçılıq etdiyi koalisiya İraqda hərbi bazaları təhvil verib

News.ru yazır ki, ABŞ-ın başçılıq etdiyi beynəlxalq koalisiya İraqda bütün hərbi obyektləri İraq tərəfinə təhvil vermə prosesini tamamlayıb.

İraqın təhlükəsizlik orqanlarının mətbuat katibi Saad Maan bildirib ki, sentyabrın 30-dan sonra ölkədə koalisiyanın nə döyüş, nə də təlim qüvvəsi qalmayacaq.

Maan vurğulayıb ki, İraq ordusu koalisiya qüvvələri getdikdən sonra ölkənin təhlükəsizliyini tam şəkildə öz üzərinə götürməyə hazırdır. İraq hökuməti koalisiya ölkələri ilə münasibətləri ikitərəfli əsaslarla quracaq.

İraq hakimiyyəti dəfələrlə sentyabrın 30-u koalisiya hərbi qüvvələrinin tam çıxarılması üçün son tarix olaraq təsbit etdiyini açıqlayıb.

Koalisiya 2014-cü ildə ABŞ-ın təşəbbüsü ilə yaradılıb, əsas məqsədi İraq və Suriyada terrorçuluğa qarşı mübarizə aparmaqdır. Eyni il avqust ayında "Qətiyyətli Qərarlılıq" (Inherent Resolve) əməliyyatı başlayıb.

İraq Daxili İşlər Nazirliyi isə ölkənin qərbində yerləşən Ənbar vilayətindəki istifadəsiz bir binada təxminən 50 pilotsuz uçuş aparatı və onların mərmilərini əldə edib. Nazirlik həmin materialların mənşəyini araşdırmaq üçün təhqiqat və texniki tədbirlər həyata keçirir.