Yunanıstan partiyaları ABŞ səfirinin iddialarına etiraz edir

Anadolu Agentliyi yazır ki, Yunanıstanın Radikal Sol İttifaq Partiyası (SYRIZA) ABŞ səfiri Guilfoyle barədə iddiaları ciddi sayaraq, baş nazir Kiryakos Miçotakisdən olayın baş verib-vermədiyini açıqlamağı tələb edib.

Partiya həmçinin Ətraf Mühit və Enerji Naziri Stavros Papastavrunun ABŞ səfiri tərəfindən təhdid edilib-edilmədiyini və hökumətin bu məsələyə necə reaksiya verdiyini açıqlamasını istəyib.

Yeni Sol partiyası xəbər yayılandan 24 saat keçməsinə baxmayaraq hökumətin iddiaları təsdiq etmədiyini və ya inkar etmədiyini bildirərək, hadisənin mart ayında baş verməsinə baxmayaraq niyə ictimaiyyətə açıqlanmadığını soruşub.

Yunanıstan Kommunist Partiyası hökuməti sakit qalmaqda ittiham edir və ABŞ-ın Yunanıstanla strateji əməkdaşlığına, həmçinin ABŞ maye qazının Balkanlara daşınmasına qarşı çıxır.

"Wall Street Journal"da yayılan məqalədə Guilfoyle-un martda Afinada Yunan və ABŞ rəsmilərinin iştirak etdiyi nahar zamanı Papastavru ilə mübahisə etdiyi bildirilir.

Məqalədə Guilfoyle-nun Rumıniya hökumətinin yaxın gələcəkdə devriləcəyindən və bu cür addımların başqa ölkələrdə də həyata keçirilə biləcəyindən danışdığı qeyd olunub. Papastavru isə ABŞ-ın Yunan xalqının seçdiyi hökuməti dəyişə bilməyəcəyini bildirib. Guilfoyle-nun vəkili həmin söhbətin yazılma üsuluna etiraz edib.

Həmçinin Guilfoyle-un Amerikan maye qazının Yunanıstan vasitəsilə Balkanlara və Ukraynaya daşınmasını nəzərdə tutan "Düzənli Dəhliz" layihəsi üzərində çalışdığı və ABŞ-ın Avropanın Rusiya qazından asılılığını azaltmaq üçün Amerikan maye qazı satışını artırmağa çalışdığı vurğulanıb.