Yəmən savaşında hökumət və husilər döyüşləri davam etdirir

Anadolu Ajansı yazır ki, Husi yaraqlılarının hərbi sözçüsü Yahya Seri bildirib ki, Səudiyyə Ərəbistanına məxsus F-15 tipli döyüş təyyarəsi Hamis Muşayt Hava Bazasından qalxaraq Taiz və Cevf vilayətlərində hava hücumları həyata keçirib.

Seri iddia edib ki, təyyarə Meviye rayonundakı bazara iki, daha sonra isə Hub və eş-Şaaf rayonlarına dörd hava hücumu edib. Həmin hücumlarda təxminən 50 nəfərin öldüyü və yaralandığı bildirilib.

Husilərin El-Mesira televiziya kanalı isə Taizdəki hücumlarda beşi uşaq olmaqla yeddi nəfərin öldüyünü, 40-dan çoxunun yaralandığını açıqlayıb.

Digər tərəfdən, Yəmən hökumət qüvvələri Taiz şəhərinin şərqində yerləşən Meviye rayonunda Husilərə aid düşərgələrin və avadanlıqların hava hücumları ilə zərər gördüyünü bildirir. Hərbi mövqelər, sursat anbarları və hərbi kömək konvoyları da hədəfə alınıb.

Amalika Qüvvələri Lahic bölgəsində, Vətən Qalxanı Qüvvələri isə Dali vilayətində Husilərə qarşı pilotsuz uçuş aparatları ilə hücumlar həyata keçirib.

Səudiyyə Ərəbistanından həmin hücumlara dair hələ rəsmi bəyanat verilməyib.