Yəmən ordusu Hüsi hədəflərinə 24 saatda 257 hücum təşkil edib

Anadolu Ajansı yazır ki, Yəmən Silahlı Qüvvələri son 24 saat ərzində Hüsi qruplaşmasının komanda və idarəetmə mərkəzləri, toplanma və təchizat məntəqələri, ehtiyat birlikləri, silah-sursat anbarları və hərbi təminat xəttlərində 257 hücum təşkil edib.

Hücumlar döyüş təyyarələri, pilotsuz uçuş aparatları, artilleriya bölmələri, raketlər və çoxnamlulu raketatanlardan istifadə edilməklə həyata keçirilib.

Hücumların əsas istiqamətləri arasında Sanaa, Midi, Bəkəm, Cavf, Mərib, Beyda, Lahic və Təiz vilayətləri yer alıb.

Bu hücumlarda Hüsi qruplaşmasının ən azı 700 üzvünün öldüyü və ya yaralandığı, 170 hərbi avtomobil və döyüş texnikasının məhv edildiyi və ya işə yaramaz vəziyyətə düşdüyü bildirilib.

Yəmən ordusu açıqlamasında bu hücumların Hüsi qruplaşmasının hərbi gücünə birbaşa təsir etdiyini və onların mülki insanlara hücum imkanlarını məhdudlaşdırdığını vurğulayıb.

Yəmən ordusu ölkənin suverenliyini qorumaq və dövlət qurumlarının nəzarətini bərpa etmək məqsədilə hərbi əməliyyatlarını davam etdirəcəyini bəyan edib.