"Wing", "Alphabet" şirkətinə məxsus və müstəqil dronlarla ərzaq və hətta qəhvə çatdıran firma, "Walmart"la əməkdaşlıq sayəsində ABŞ-ın yeddi yeni şəhərində fəaliyyətini genişləndirir.

Bu genişlənmə proqramının məqsədi 2027-ci ilə qədər "Walmart"ın 270-dən çox filialında dron çatdırılma şəbəkəsi qurmaqdır. Yeni bazarlar arasında Memfis, Nyu-Orleans, Filadelfiya, Feniks, San-Dieqo, San-Fransisko körfəz bölgəsi və Salt Leyk Siti var. Beləliklə, "Wing" və "Walmart"ın ümumi xidmət sahəsi ABŞ-da təxminən 20 şəhəri əhatə edir.

"Wing" artıq Atlanta, Dallas-Fort Worth və Böyük Hyustonda "Walmart" məhsullarını çatdırır. Qeyd edilib ki, şirkət yaxın vaxtlarda Orlando, Tampa, Şarlott, Sent-Luis, Sinsinnati, Los-Anceles və Mayamidə də fəaliyyət göstərəcək.

"Walmart" uzun illər dron çatdırılması xidmətini sınayıb. Lakin Dallas-Fort Worth və Atlantada "Wing" ilə uğurlu əməkdaşlıqdan sonra layihəni genişləndirmək qərarına gəlib. Yanvarda şirkətlər əlavə 150 "Walmart" mağazasında dron çatdırılması xidmətinin yaradılacağını açıqlayıb.

Nəticə olaraq, istehlakçılar dron çatdırılmasını düşündüklərindən daha çox istifadə edir. "Wing" "Walmart"la əməkdaşlıqda 1 milyondan çox kommersiya çatdırılmasını həyata keçirib.

"Wing" şirkətinin biznes üzrə baş direktoru Hitər Rivera yanvarda bildirmişdi ki, ən aktiv 25 faiz müştəri həftədə üç dəfə bu xidmətdən yararlanır.

"Walmart"la işimiz göstərir ki, dron çatdırılması sadəcə yenilik deyil, müştərilərin həftədə bir neçə dəfə güvəndiyi xidmətə çevrilib, – Rivera yeni bazarların elanında bildirdi.