Ukraynalılar Zelenski ilə açıq mətbuat konfransı istəyir

Ukraynalılar prezident Vladimir Zelenski ilə müstəqil və ictimaiyyət üçün açıq mətbuat konfransının təşkil olunmasını istəyirlər. Ukrainskaya Pravda yazır ki, bunun üçün petisiya 25 min imza toplayıb və hazırda baxılması gözlənilir.

Petisiya 27 avqustda dərc olunub və imzaların toplanması 27 noyabradək davam edəcək.

Petisiyada açıq mətbuat konfransının müstəqil və tənqidi mövqedə olan jurnalistlərin iştirakı ilə keçirilməsi vacib olduğu vurğulanır. Bu jurnalistlərin daxili siyasət, hakimiyyət qərarları və aksiyalar zamanı səslənən tələblər barədə kəskin və dəqiq suallar verəcəyi bildirilir.

Konfransda "Ukrainskaya Pravda", Bihus.Info, "Sledstvo.Info", Radio Svoboda, hromadske, The Kyiv Independent, Suspilne, NV, "Zerkalo Nedeli", BBC Ukraina, Liga.net və digər KİV nümayəndələrinin iştirakına çağırış edilir. Verilən sualların əvvəlcədən koordinasiya olunmadan verilməsi tələb olunur.

Sonuncu böyük mətbuat konfransı Zelenskinin 2025-ci ilin fevral ayında keçirilib. Ondan sonra prezident xarici səfərlər zamanı, xarici nümayəndə heyətləri ilə bağlı brifinqlərdə və ara-sıra sosial şəbəkələrdə media ilə ünsiyyət qurur.