Ukrayna Qüvvələri Rusiyada "İskəndər-M" təmir bazası və digər hərbi obyektləri vurdu

Oktyabrın 12-də və 13-nə keçən gecə Ukrayna Müdafiə Qüvvələrinin birləşmələri Rusiya işğalçı ordusunun bir sıra hərbi obyektlərinə zərbə endirib.

Məlumatı Ukrayna Müdafiə Qüvvələrinin Baş Qərargahı verib.

Belə ki, Rusiya Federasiyasının Kursk vilayətinin Kondrinka rayonunda "İskəndər-M" əməliyyat-taktiki raket kompleksinin özünüyeridən buraxma qurğuları və yük maşınlarının təmir bazası vurulub.

Baş Qərargahın məlumatına görə, Rusiya Federasiyasının Bryansk vilayətində Şkryabino qəsəbəsi yaxınlığında düşmənin radiolokasiya stansiyası zərər görüb.

Ukraynanın müvəqqəti işğal olunmuş Luhansk vilayətində isə rus bölmələrinin logistika obyektləri vurulub. Dolyansk yaxınlığında yanacaq anbarı, Rubejnı yaxınlığında isə sursat anbarı məhv edilib.

Ukrayna hərbçiləri həmçinin düşmənin canlı qüvvəsinin toplaşdığı yerlərə zərbələr endirib. Donetsk vilayətinin Selidove, Razdolnoye, Sujenka və Mirnoqrad rayonlarında, Zaporojye vilayətinin Naberjnoye və Luhansk vilayətinin Kuzemovka bölgəsində rus ordusunun toplaşmaları vurulub.