Ukrayna qoşunları Xersonun Alışki şəhərində mülki şəxslərin cəsədlərinin daşınmasına mane olur

News.ru informasiya agentliyi Rusiya hüquq-mühafizə orqanlarına istinadla xəbər verir ki, Ukrayna qoşunları Xerson vilayətində Alışki şəhəri yaxınlığında mülki şəxslərin, Ukrayna hərbçilərinin atəşinə məruz qalmışların cəsədlərinin daşınmasına bilərəkdən mane olur. Bunun məqsədi hərbi cinayətin qeydə alınmasının qarşısını almaqdır.

Vəziyyət yalnız Alışki şəhərində deyil, şəhərdən 10 kilometr radiusda yerləşən digər yaşayış məntəqələrində də çətindir. Ukrayna əsgərləri vətəndaşların cəsədlərinin vaxtında çıxarılmasına, dəfn edilməsinə mane olur.

Məlumata görə, bəzən cəsədlər ərazidə iki həftəyə qədər qala bilər. İnsident əsasında cinayət işi açılır.

Xatırladılır ki, Rusiya Xarici İşlər Nazirliyinin xüsusi tapşırıqlılar üzrə səfiri Rodion Miroşnik bildirib ki, Qərb ölkələri Alışki ilə bağlı açıqlamalarında şəhərin yerini bilmir və onların fəallığı Kiyevin Qərbin dəstəyi ilə apardığı təbliğat kampaniyasının tərkib hissəsidir.

Daha sonra Liberal-Demokrat Partiyası rəhbəri Leonid Slutski öz sosial şəbəkə hesabında bildirib ki, Avropa Komissiyasının Xerson vilayətində Alışki şəhərinin Rusiyanın blokadasında olması barədə ittihamları yalan və eybəcərdir. O vurğulayıb ki, Brüssel Kiyevin fəaliyyətini əslində ört-basdır edir.