Türkiyədə qaçaqçılığa qarşı geniş əməliyyat keçirildi

Hürriyet yazır ki, Türkiyənin Daxili İşlər Nazirliyi ölkədə qeyri-qanuni miqrasiya və qaçaqçılığa qarşı mübarizəni gücləndirib. 81 şəhərdə keçirilən genişmiqyaslı əməliyyatda 19 qaçaqçı tutulub, 230 qeyri-qanuni miqrant müəyyən edilərək saxlanılıb.

Əməliyyatlarda ümumilikdə 279 min 575 nəfərin şəxsiyyəti yoxlanılıb. Bu işdə Göç İdarəsi, Polis, Jandarma və Sahil Mühafizəsi birgə fəaliyyət göstərib. Təxminən 15 min 905 əməkdaş 5 min 11 qrup şəklində, 3 min 229 fərqli ünvanda əməliyyata cəlb olunub.

Qanunsuz miqrasiyanın qarşısının alınması məqsədilə 2 min 214 yararsız bina, 3 min 893 ictimai yer və 1 min 227 digər növ obyekt yoxlanılıb. Saxlanılan qeyri-qanuni miqrantların vətənlərinə qaytarılması prosesi başlanıb.

Daxili İşlər Nazirliyi və əlaqədar qurumlar ölkədə təhlükəsizliyin təminatı üçün bu mübarizəni qətiyyətlə davam etdirir. Nazirlik polisləri, jandarmaları, sahil mühafizəsi əməkdaşları və göç idarəsi işçilərini əməliyyatlarda göstərdikləri fədakarlığa görə təbrik edib.