Türkiyə milli süni intellekt platforması EVREN-i istifadəyə verdi

Anadolu Agentliyi yazır ki, Türkiyənin müdafiə sənayesi, texnologiya şirkətləri, akademiklər, sahibkarlar və tələbələr daxil olmaqla geniş istifadəçi kütləsinə yönəlmiş EVREN süni intellekt platforması fəaliyyətə başlayıb.

EVREN verilənlər, süni intellekt modelləri və yüksək performanslı hesablamanı bir məkanda birləşdirir. İstifadəçilərin sorğu və cavabları Türkiyədə yerləşən yüksək performanslı GPU infrastrukturu üzərində işlənir və bununla məlumatların xarici bulud xidmətlərinə ötürülməsinin qarşısı alınır. Platformaya e-Devlet identifikasiyası ilə evren.ssyz.org.tr vasitəsilə daxil olmaq mümkündür.

Platforma ödənişli giriş əvəzinə kredit modeli ilə işləyir. İstifadəçilər məlumat yükləmə, etiketləmə və ya öyrədilmiş modellərini paylaşmaqla kredit qazana bilirlər. Bu kreditlər yüksək performanslı GPU-lar üzərində model öyrədilməsi və böyük dil modellərinin tətbiqi üçün istifadə edilir.

EVREN kompüter görməsi üçün obyekt aşkarlanması, seqmentləşdirmə və təsnifat kimi işlərdə uçdan uca məlumat etiketləmə və model təlimi təklif edir. Platformada 11 açıq mənbəli böyük dil modeli mövcuddur və API arxitekturası sayəsində digər tətbiqlər EVREN infrastrukturuna bağlana bilir.

Platformanın istifadə imkanlarının genişləndirilməsi məqsədilə 1 noyabr tarixinə kimi API çağırışları kreditlərdən azad edilərək limitsiz təqdim olunur. Qısa müddətdə 7 min 500 aktiv istifadəçiyə çatan EVREN, Türkiyənin süni intellekt ekosisteminin inkişafına və Süni İntellekt Fəaliyyət Planı çərçivəsindəki işlərə dəstək verməyi planlaşdırır.

Gələcəkdə EVREN-in yerli böyük dil, görüntü və səs modelləri ilə təkmilləşdirilməsi və paylanmış GPU idarəetmə yanaşması ilə hesablama infrastrukturunun gücləndirilməsi nəzərdə tutulur. Bu addımlar Türkiyədə müdafiə sənayesi, universitetlər və texnologiya müəssisələri üçün ortaq süni intellekt inkişaf mühiti yaratmağı hədəfləyir.