“Qlobal hazır geyim və tekstil ticarətində ox istiqamətinin dəyişməsi” adlı hesabat göstərir ki, Türkiyə istehsalçıları ənənəvi ixrac bazarlarından kənara çıxaraq yeni bazarlara üz tutur.

Türkiyə hazır geyim ixracatçıları 2026-cı ilin ilk rübündə 4,28 milyard dollar dəyərində ixracat həyata keçirib. Avropa İttifaqı ölkələri hələ də bu sahənin əsas satış bazarıdır, lakin Avropa iqtisadiyyatındakı zəif göstəricilər ixracatçıları bazar çeşidini artırmağa sövq edir.

Türkiyə Geyim Sənayesi Distribyutorları Birliyinin (TGSD) hesabatında sənayenin strateji inkişafı üçün ənənəvi Aİ regionundan kənarda yeni bazarlara diqqətin artırılması vacib sayılır.

Hesabata görə, Avropa Türkiyənin hazır geyim məhsullarının əsas ixrac bazarını saxlayır. 2026-cı ilin birinci rübündə bu bölgəyə 2,31 milyard dollar dəyərində ixrac olub. Lakin Böyük Britaniya, İtaliya və Almaniyada əsas bazarlarda azalmalar müşahidə edilir.

Aİ-yə ixrac 2026-cı ilin ilk rübündə 9,2 faiz azalıb, Almaniya və İtaliyaya ixrac isə 16 faiz düşüb. Eyni dövrdə İraq 22,8 faiz artımla fərqlənib, keçmiş Şərqi Blok ölkələrinə ixrac isə 25 faiz yüksəlib.

Hesabat Türkiyənin daxili hazır geyim bazarının idxala daha açıq olduğunu göstərir. Ötən 19 il ərzində Türkiyənin qlobal hazır geyim ixracındakı payı 4 faizdən 3 faizə enib, idxalda isə 0,3 faizdən 0,8 faizə yüksəlib.

Tekstil sektoru isə hazır geyimdən fərqli olaraq daha yaxşı göstərici göstərib. Türkiyənin qlobal tekstil ixracındakı payı 2006-cı ildə 2,6 faizdən 2025-ci ildə 3,5 faizə yüksəlib. Tekstil idxalındakı payı isə 3,3 faizdən 3 faizə azalıb.

Hesabatda Çinin hazır geyim ixracında bazar payı itirdiyi qeyd olunur. Bu pay əsasən Banqladeş və Vyetnam tərəfindən ələ keçirilib. Türkiyə xaricində digər əsəs istehsalçı ölkələr sürətlə ixracatlarını artırsa da, Türkiyə global hazır geyim ticarətində bu dəyişiklikdən kifayət qədər pay ala bilməyib.

Yekun nəticələr göstərir ki, Türkiyənin hazır geyim ixracatçıları ənənəvi Avropa bazarlarında təzyiq altında qalır, amma Şərqi Avropa, İraq və digər alternativ bazarlar sektorun ixrac perspektivində əhəmiyyətli yer tutur.