Türkiyə Futbol Federasiyası MHK sədri Gündoğdu ilə bağlı açıqlama yayıb

Hürriyet yazır ki, İstanbulda dörd il ərzində aparılan əməliyyat çərçivəsində Mərkəzi Hakimlər Komitəsi (MHK) sədri Ferhat Gündoğdu da daxil olmaqla 7 şübhəli tutulub. Həmçinin Türkiyə Faal Futbol Hakimləri və Nəzarətçiləri Dərnəyinin sənədlərinə əl qoyulub.

Türkiyə Futbol Federasiyasından bildiriblər ki, federasiya idarə heyəti üzərinə düşən vəzifələri yerinə yetirərək, "təmiz futbol, ədalətli oyun" prinsiplərini gücləndirmək məqsədilə fəaliyyətini davam etdirir. İdarə heyəti bahis və qanunsuz bahislərlə bağlı məsələni ciddi şəkildə araşdırıb, Ədliyyə, Daxili İşlər və Gənclik və İdman nazirlikləri ilə əməkdaşlığı davam etdirir.

Açıqlamada qeyd olunub ki, aprel 2025-dən başlayaraq federasiya İstanbul Cumhuriyyət Baş Prokurorluğuna bir neçə cinayət müraciəti göndərib. TFF-dən istənilən sənədlər bağlı zərflərdə, barmaq izi, DNT qalıqları kimi analizlər üçün hüquq-mühafizə orqanlarına təqdim edilib.

Federasiya idarə heyəti fəaliyyətə başladığı andan etibarən məsuliyyətlərini yerinə yetirməyə çalışıb. Federasiya hüququn aliliyinə, məhkəmələrin müstəqilliyinə və ədalətli prosesin sağlam aparılmasına tam inamını ifadə edib.

Türkiyə Futbol Federasiyası ictimaiyyətdən yalnız aidiyyəti qurumların açıqlamalarına əsaslanmağı xahiş edib.