Türk Dövlətləri Üzvü Ölkələrin Enerji Ustaları Ankarada Yarışdı

Türk Dövlətləri Təşkilatına (TDT) üzv ölkələrin enerji mütəxəssisləri arasında Peşəkar Ustalıq Yarışması Türkiyənin Elektrik Dağıtım AŞ-si (TEDAŞ) ev sahibliyində Ankarada keçirildi. Anadolu Agentliyi yazır ki, tədbir Enerji və Təbii Ehtiyatlar Nazirliyinin himayəsində təşkil olunub.

Yarışmada Türkiyə, Azərbaycan, Qazaxıstan, Qırğızıstan və Özbəkistandan gələn gənc elektrikçilər peşə biliklərini və bacarıqlarını tətbiqi mərhələlərdə nümayiş etdirdi. "Qardaş Şəbəkələrdə Ortak Ağıl və Mükəmməllik" şüarı altında TEDAŞ-ın Təhsil və Sertifikatlaşdırma Mərkəzində təşkil olunan yarışda yüksək gərginlik tərəfdəki nasaz sigortanın dəyişdirilməsi praktikası yer aldı.

TDT Baş katibliyi və Elektrik Dağıtım Xidmətləri Dərnəyinin (Elder) dəstəyi ilə keçirilmiş yarışda iştirakçılar aşağı, orta və yüksək gərginlik manevrlərini və yerli torpaq bağlantısı əməliyyatlarını yerinə yetirdi. Hakimlər iş sağlamlığı və təhlükəsizliyi, düzgün avadanlıq seçimi, nasazlığın aşkar edilməsi və komandalararası əlaqəni qiymətləndirdi.

Yarışmanın sonunda beş kateqoriyada mükafatlar təqdim edildi. Özbəkistan "Ən Diqqətli Usta Komanda", Qırğızıstan "Ən Koordinasiyalı Komanda", Türkiyə "Ən Təcrübəli Usta Komanda", Azərbaycan "Ən Praktik Usta Komanda", Qazaxıstan isə "Ən Uğurlu Usta Komanda" mükafatını qazandı.

Gələn ilin yarışına Qazaxıstan ev sahibliyi edəcək. Eyni zamanda, təşkilatın növbəti dövrünə Qazaxıstan sədrlik qəbul etdi. Bu çərçivədə üzv ölkələr arasında enerji əməkdaşlığının və təcrübə mübadiləsinin daha da inkişaf etdirilməsi planlaşdırılır.

TEDAŞ Baş direktoru Suat Sarıgül bildirib ki, yarışma Türk dövlətləri arasında enerji sahəsində əməkdaşlığı gücləndirməyi, həmçinin gənc mütəxəssislərin texniki bacarıqlarını və təcrübə paylaşımını artırmağı hədəfləyir. O, iş sağlamlığı və təhlükəsizliyinin böyük əhəmiyyət daşıdığını vurğulayıb.