Tramp qırmızı dizelin yol istifadəsinə müvəqqəti icazə verib

Anadolu Ajansı yazır ki, Ağ Evdən paylaşılan məlumata görə, Donald Tramp qırmızı boyalı dizelin yol istifadəsinə müvəqqəti icazə verən və bu yanacağa tətbiq olunan federal istehlak vergisinin ödənilməsini təxirə salan fərmanı imzalayıb.

Məlumatda qeyd edilib ki, kənd təsərrüfatı maşınları, inşaat avadanlıqları və digər yol xaricində istifadə olunan nəqliyyat vasitələri üçün nəzərdə tutulan bu yanacaq normal dizellə eynidir, lakin yol xaricində vergidən azad satıldığı üçün qırmızı rəngə boyanır.

Qərarla ABŞ Maliyyə Nazirliyinə qırmızı boyalı dizelin yol istifadəsinə tətbiq olunan federal istehlak vergisinin il sonuna qədər faiz və cərimə olmadan təxirə salınması tapşırılıb. Həmçinin təxirə salınmış vergilərin ödənilmə öhdəliyinin ləğvi variantları araşdırılacaq.

ABŞ Nəqliyyat Nazirliyinə bu yanacağa çıxışla bağlı ştatlar, sektor nümayəndələri və işçi təşkilatları ilə koordinasiyanı təmin etmək tapşırılıb. ABŞ Kənd Təsərrüfatı Nazirliyindən isə tələbin yüksək olduğu bölgələrdə fermerlərin qırmızı boyalı dizelə çıxışını təmin etməsi və ştatları oxşar addımlar atmağa təşviq etməsi istənib.

Məlumatda qərarın məqsədinin fermerlərin, yük sürücülərinin və digər işçilərin yanacaq xərclərini azaltmaq olduğu vurğulanıb. Məsələn, yük sürücülərinin hər doldurmada 100 dollardan çox qənaət edə biləcəyi qeyd olunub.

Əlavə olaraq bildirilir ki, federal dizel vergisi gallon başına 24,4 sentdir və 250 gallon üçün bunun təxminən 60 dollara bərabər olduğu göstərilib. Qanunvericiliyə görə, dizel istifadə məqsədinə görə vergiyə cəlb olunur və yol istifadəsini müəyyən etmək üçün yanacaq qırmızı rəngə boyanır.