Tennessee qubernatoru Christa Pike-nin edamını təsdiqlədi

BBC News yazır ki, Tennessee qubernatoru Bill Li, ölüm cəzası alan Christa Pike-nin əfv müraciətini rədd edib və edam hökmünün icra olunmasına müdaxilə etməyəcəyini açıqlayıb.

Pike hazırda 50 yaşındadır. O, 18 yaşında olarkən, problemli yeniyetmələr üçün təşkil edilmiş iş təlim düşərgəsində tanış olduğu 19 yaşlı Colleen Slemmer-i döyüb, işgəncə verərək öldürüb.

Onun müdafiəçiləri vəkillərin ABŞ Ali Məhkəməsinə son dəqiqə təxirəsalınma tələbi ilə müraciət etdiklərini bildirirlər. Əgər edam icra olunsa, Pike Tennessee ştatında 200 ildən sonra edam olunan ilk qadın olacaq.

1970-ci illərdən sonra ABŞ-da yalnız 18 qadın edam olunub, kişilər üçün isə bu göstərici 1.663-dür. Pike-nin vəkilləri bildirirlər ki, onun cinayəti törətdiyi vaxt beyni tam yeniyetmə beynidir və 18 yaşı ölüm hökmü üçün gənc yaş sayılır.

Pike-nin müdafiəçiləri həmçinin onun uşaqlıqda seksual zorakılıq, tərk edilmə və laqeydlik kimi ciddi travmalar yaşadığını, müasir hüquq sistemində isə o dövrdəkindən fərqli qərar verilə biləcəyini qeyd edirlər. Müdafiə komandası bildirir ki, Pike bu gün 50 yaşında peşmanlıq hiss edən, düzgün müalicə alan və həbsxanada digər qadınların qayğısına qalan biridir.

1995-ci ildə törədilən qətl Knoxville-də böyük səs-küy yaradıb. Colleen Slemmer-in bədənində satanik ritual simvolu sayılan pentagram oyulduğu aşkar edilib. Pike isə Colleen-i onun dostunu və oğlanını oğurlamağa çalışmaqda ittiham edib. O dövrdə həmin düşərgədə olan iki şəxs onun cinayəti etiraf etdiyini və Colleen-in kəllə sümüyündən bir parçanı göstərdiyini bildiriblər.