Hindistanın elektronika və yarımkeçirici istehsalçısı Tata Electronics, Apple və Tesla da daxil olmaqla digər böyük texnologiya şirkətlərinin əsas tədarükçüsü kimi, haker forumunda yayılan fayllardan sonra məlumat sızdırılmasını təsdiqləyib.

Forumda yayımlanan məlumatların ümumilikdə 630 QB-dan çox və 204 min 300-ə yaxın faylı əhatə etdiyi iddia edilir. TechCrunch tərəfindən yoxlanılmış nümunələrdə Apple tədarükçüsünə aid spesifikasiyalar və Tesla istehsalına dair sənədlər aşkar olunub, lakin məlumatların həqiqiliyi və tamlığı müstəqil qaydada təsdiqlənməyib.

2020-ci ildə qurulan Tata Electronics, Hindistanın elektronika istehsalını və yarımkeçirici sənayesini genişləndirmək təşəbbüsünün mühüm iştirakçısıdır. Şirkət Hindistan üzrə fəaliyyət göstərən müəssisələrdə 75 mindən çox əməkdaş çalışdırır. Apple, ASML, Intel, Qualcomm və Tesla kimi dünya şirkətləri ilə tərəfdaşlıqları var. Bu, istehsal zəncirlərinin Çindən çıxarılması və Hindistana yönəldilməsi strategiyasının bir hissəsidir.

Kiber təhlükəsizlik mütəxəssisi Rajshekhar Rajaharia, forumda yayımlanan məlumatlar arasında Outlook poçt yazışmaları, SAP-ə aid sənədlər və Tata Electronics-in bəzi müştərilərinə, o cümlədən Apple və Tesla-ya aid sənədlərin olduğunu bildirib.

Tata Electronics-in rəsmi nümayəndəsi məsələilə bağlı açıqlama verərək, bir neçə həftə əvvəl şirkətin bəzi sistemlərində kiberhücumun aşkarlandığını və dərhal müdaxilə tədbirlərinin görüldüyünü bildirib. Şirkət fəaliyyətlərin heç bir şəkildə təsirlənmədiyini vurğulayıb.

Lakin, şirkət sızdırılan məlumatların növü, zərərçəkmiş təşkilatların sayı, müştərilərin məlumatlandırılması və Apple ilə Tesla-ya aid məlumatların açıqlanıb-açıqlanmadığı barədə suala cavab verməkdən imtina edib.

Tata Electronics-in iPhone yığımı üzrə bəzi əməkdaşlarına məlumat sızdırılması barədə xəbər verdiyi bildirilir. Apple hadisəni araşdırır və Tata Electronics-ə qarşı fidyə tələb olunub.

Tata Qrupu dünyanın texnologiya təchizat zəncirlərində rolunu artırır. 2023-cü ildə o, Tayvanın Wistron şirkətinin Hindistandakı fəaliyyətini əldə edərək iPhone istehsalına başlayıb. Daha sonra Tata Electronics Apple-ın digər əsas istehsal partnyoru Pegatron-un Hindistan bölməsinin 60 faiz hissəsini alıb.

2024-cü ildə Tata Tesla ilə yarımkeçirici təchizatı barədə müqavilə bağlayıb ki, bu əlaqələr şirkətin dünyanın ən böyük texnologiya şirkətləri ilə əməkdaşlığını göstərir.

Apple və Tesla məsələ ilə bağlı açıqlama verməyib.