Sorğu Avropa İttifaqı vətəndaşlarının yarıdan azı Ukraynanın sürətli üzvlüyünü dəstəkləyir

Bertelsmann Stiftung-un eupinions layihəsi üçün Nira Data tərəfindən Aİ-nin 27 üzv ölkəsinin hamısında və Ukrayna hökumətinin nəzarətində olan ərazilərdə aparılan sorğu Aİ vətəndaşlarının 47 faizinin Ukraynanın yaxın illərdə ittifaqa qoşulmasını istədiyini, Ukraynalıların isə bu dəstəyinin 83 faiz olduğunu üzə çıxarıb.

Ukraynanın Aİ-ə üzvlüyünə dəstək ölkələr arasında fərqlidir. Sorğuda ən çox dəstək İsveçdə 69 faiz olub. Rumıniyada isə dəstək ən aşağı səviyyədə, 40 faiz təşkil edib.

Aİ-dən olan respondentlərin çoxunda Ukraynanın üzvlüyünün iqtisadi xərcləri əsas qayğı kimi görünür.

Şərqi Avropa üzrə ekspert Miriam Kosmehl deyib ki, "Ukraynanın qeyri-sabit maliyyə vəziyyəti bütövlükdə Aİ üçün çətinlikdir, çünki böyük Avropa qonşusundakı sabitlik hər kəs üçün vacibdir. Yalnız bərpa üçün qiymətləndirilən maliyyə ehtiyacı artıq 500 milyard avrodan ($560 milyard) çoxdur."

Aİ-yə daxil olma halında artan maliyyə yükünü əsas problem kimi 28 faiz Aİ vətəndaşı görür.

Hesabatda təhlükəsizlik məsələsi də vurğulanıb.

58 faiz ukraynalı hesab edir ki, onların ölkəsi mümkün rus təcavüzündən Aİ-ni qorumağa daha çox töhfə verir. Ancaq Aİ vətəndaşlarının cəmi 16 faizi bu fikirlə razıdır.

Ukraynadan başqa, Almaniya, Fransa və Niderland əhalisinin ən çox hissəsi Ukraynanın Avropanı Rusiyadan qorumaqda daha çox səylə çıxış etdiyini düşünür.

Yalnız 14 faiz Aİ vətəndaşı Ukraynanın üzvlüyünün ittifaqı "daha güclü və qlobal səviyyədə daha nüfuzlu edə biləcəyi" fikrindədir.

Kosmehl qeyd edib ki, Ukraynanın öz suverenliyi və müstəqilliyini müdafiəsi birbaşa Avropada demokratiya və təhlükəsizliyin gələcəyinə təsir edir.

"Rusiya daxili parçalanmalardan istifadə edərək Aİ konsensusunu və həmrəyliyini zəiflətməyə çalışır. Açıq cəmiyyətlər hədəfə yönəldilmiş təsir əməliyyatları ilə mübarizədə xüsusi çətinliklərlə üzləşir," – deyə ekspert əlavə edib.