Rusiyada laboratoriyada vəba səbəbindən karantin elan edildi

Al Jazeera yazır ki, Rusiyanın Sibir bölgəsində vəba tədqiqat institutu işçinin ölümündən sonra karantin tətbiq edilib. 28 yaşlı Darya Şipilova adlı işçi pnevmonik vəba şübhəsi ilə keçən həftə vəfat edib.

Şipilova sentyabrın 30-da iş yerində xəstələnib və iki gün sonra yaxın ərazidəki Şelexov şəhərində xəstəxanada dünyasını dəyişib. Rusiya mediası laboratoriyada qəza baş vermiş ola biləcəyini bildirsə də, rəsmi təsdiq yoxdur.

Ölənlə təmasda olmuş təxminən 200 nəfər karantinə alınıb, xəstəxananın bir hissəsi mühasirəyə götürülüb, yaxınlıqdakı alüminium zavodunda isə işçilərə maska taxmaq göstərişi verilib.

Rospotrebnadzorun rəhbəri Anna Popova bölgəyə gedərək yerli hökumət nümayəndələri ilə görüşüb. İrkutskda COVID və rinovirus infeksiyasına yoluxmalar qeydə alınıb, amma digər yoluxucu xəstəliklər aşkarlanmayıb.

Rusiya hakimiyyəti qadının xəstəliyinin laboratoriyada işlədiyi patogenlərlə əlaqəsi olmadığını bildirib və vəziyyətin nəzarətdə olduğunu vurğulayıb. İrkutsk qubernatoru İqor Kobzev ölümü “müəyyən olunmamış etiologiyalı pnevmoniya” kimi qiymətləndirib.

Vəba bakteriyası Yersinia pestis tərəfindən törədilən ağır infeksiyadır. Pnevmonik vəba nadir olmaqla yanaşı, insanlardan insana yoluxa bilir. Bu xəstəlik erkən mərhələdə müalicə olunmasa ciddi fəsadlara və ölümə səbəb ola bilər. Dünya üzrə ildə 1-2 min vəba hadisəsi qeydə alınır.