Rusiya Ukrayna münaqişəsi üzrə təkliflərə açıqdı

TASS yazır ki, Hindistandakı Rusiya səfiri Denis Alipov bildirib ki, Moskva Ukrayna münaqişəsi ilə bağlı Hindistan və digər ölkələrin hər hansı praktik təkliflərini nəzərdən keçirməyə hazırdır.

Alipov qeyd edib ki, Rusiya və Hindistan arasında münaqişə ilə bağlı çox açıq və səmimi dialoq mövcuddur, həmçinin Prezident Vladimir Putin bu məsələni Hindistanın Baş naziri Narendra Modi ilə ətraflı müzakirə edib.

Rusiyalı diplomat bildirib ki, Rusiya münaqişə ilə bağlı qısamüddətli yox, uzunmüddətli və ardıcıl həllin hazırlanmasını istəyir.

O əlavə edib ki, 2022-ci ilə qədər Rusiya NATO-nu Avropada təhlükəsizliyin ümumi prinsipləri üzrə razılığa gəlmək üçün danışıqlar masasına dəvət etmək məqsədilə bütün zəruri addımları atıb.