Rusiya Avropada müdafiə şirkətləri rəhbərlərinə sui-qəsd cəhdlərini artırır

Ukrainskaya Pravda yazır ki, beş fərqli Avropa kəşfiyyat xidmətinin məlumatına görə, Kremlin tapşırığı ilə Rusiya yaxın aylarda Ukraynaya dəstəyi zəiflətmək məqsədilə Avropada xüsusi əməliyyatlarını genişləndirir.

Xüsusilə, əvvəllər belə hədəflərin öldürülməsi Rusiya xüsusi xidmətləri üçün tabu sayılırdı, lakin indi bu planların əhəmiyyətli hissəsinə çevrilib.

Kreml agentlərinin hədəfi müdafiə şirkətlərinin rəhbərləri və yüksək vəzifəli əməkdaşlarıdır. Kiçik şirkətlərin, xüsusilə dronların istehsalı ilə məşğul olanların rəhbərləri də risk altındadır.

Almaniyanın Federal Konstitusiya Müdafiəsi Xidmətinin (BfV) nümayəndəsi Sinan Selen bildirib ki, qurum müdafiə şirkətlərində işçilər və rəhbərlərlə sıx əməkdaşlığı artırıb və şəxsi mühafizə xidmətlərinin cəlb olunmasını tövsiyə edir.

Selen həmçinin qeyd edib ki, Rusiya dövlət və dövlətə bağlı qurumlar vasitəsilə hədəf şəxslərə qarşı zorakı hadisələri planlaşdırır və bu fəaliyyətlərdə təşkilatlanmış cinayət qruplarının iştirakını müşahidə edirlər.

Bir neçə müdafiə şirkətinin rəhbəri son altı ayda hökumət təhlükəsizlik qurumlarının tövsiyəsinə uyğun olaraq şəxsi mühafizə tədbirlərini gücləndirdiyini deyib.

Rusiya Baş Qərargahının Baş İdarəsi sui-qəsdlərə görə məsul sayılır. Kəşfiyyat məlumatlarına görə, Rusiya zabitləri təşkilatlanmış cinayət qrupları ilə əməkdaşlıq edir, kəşfiyyat, logistika, planlaşdırma və icranı müxtəlif agentliklər və şəxslər arasında bölürlər.

Bəzi sui-qəsd planları ifşa edilərək qarşısı alınıb, başqa hallarda isə müəyyən şübhəli fəaliyyətlər, o cümlədən hədəf şəxslərin günlük həyatının izlənməsi qeydə alınıb.

Kəşfiyyat əməkdaşlarından biri deyib ki, Rusiyanın əsas məqsədi psixoloji təsirdir. İnsanların hər an hədəf ola biləcəyini hiss etmələri narahatlıq yaradaraq Ukraynaya dəstəyi azaldır.