Polşa Türkiyəni nümunə götürərək müdafiə sənayesini inkişaf etdirir

Anadolu Ajansı yazır ki, Polşa 2014-cü ildə 100 min olan hərbi qulluqçu sayını 220 minə çatdırıb və Avropa Birliyi daxilində ən güclü orduya malik olmaq istəyir. Polşa müntəzəm ordusunu 300 minə, ehtiyat hərbçilərini isə 200 minə çatdırmağı planlaşdırır.

Hazırda Polşa NATO-da ABŞ və Türkiyədən sonra ən böyük ordudur. Ordunun gücləndirilməsi ilə yanaşı, Polşa müdafiə sənayesinin inkişafına da xüsusi önəm verir. Polşa Baş nazir müavini və Milli Müdafiə naziri Vladislav Kosinyak-Kamış bildirib ki, Türkiyənin müdafiə sənayesindəki inkişaf modelini qəbul edirlər.

Kosinyak-Kamış əlavə edib ki, Türkiyə 20 il ərzində müdafiə sənayesində ciddi dönüş yaşayıb; əvvəllər müdafiə ehtiyaclarının yalnız 20 faizini daxili istehsaldan qarşılayır, 80 faizini idxal edirdi. İndi isə bu nisbət tam əksinə dəyişib.

Polonyalı müdafiə və geosiyasi analitik Dr. Natalia Adrianna Potera vurğulayıb ki, Türkiyə-Polşa müdafiə əməkdaşlığı artıq təkcə türk məhsullarının alınması ilə məhdudlaşmır, texnologiya transferi və ortaq istehsal sahələrinə yönəlir. MSPO beynəlxalq müdafiə sərgisində ASELSAN ilə AMZ-Kutno arasında yeni müqavilələrin imzalandığını qeyd edib.

Potera bildirib ki, Polşa Türkiyə ilə radarlar, hava müdafiəsi, elektron müharibə və pilotsuz uçuş aparatlarına qarşı sistemlər sahəsində əməkdaşlıq edə bilər. Polşa NATO sərhədlərində yerləşdiyi üçün Türkiyənin müdafiə sistemlərinə güvənir.

Analitik həmçinin qeyd edib ki, iki ölkə liderləri arasında münasibətlər möhkəmdir və Türkiyə-Polşa əlaqələri müdafiədən kənar sahələri də əhatə edir. Polşanın Türkiyəni müttəfiq kimi gördüyünü və əməkdaşlığın hər iki tərəf üçün faydalı olduğunu vurğulayıb.