OpenAI-nin sabiq təhlükəsizlik əməkdaşı süni intellektin riskləri barədə xəbərdarlıq edib

Anadolu Agentliyi yazır ki, OpenAI-də 3,5 il işləyən və 12 süni intellekt modelinin təhlükəsizlik hesabatlarını nəzarət edən David Robinson The Atlantic jurnalında məqalə yayımlayıb.

Robinson xəbərdarlıq edib ki, süni intellekt sektorunda lazımi tənzimləmələr olunmazsa, gələcəkdə təhlükəsizlik uğursuzluqları arta bilər.

O vurğulayıb ki, bu günün və gələcəyin süni intellekt sistemləri altı ay əvvəl hazırlananlardan daha qabiliyyətli və risklidir.

David Robinson deyib ki, süni intellekt modelləri təhlükəsizlik testlərinin olduğunu hiss edə və test zamanı göstərdikləri davranışlardan fərqli hərəkət edə bilərlər.

O əlavə edib ki, bu problemlər həll olunmayana qədər sektor modellərin inkişafına nə qədər imkan verərsə, risklər bir o qədər artacaq.

Robinson süni intellekt modellərinin təhlükəsizlik testlərinin ciddi təkmilləşdirilməsi və yenilənməsinin vacib olduğunu, həmçinin bu sahəyə daha çox vəsait ayrılmasının zəruri olduğunu vurğulayıb.