Ömər Çelik fond böhranı ilə bağlı açıqlama verib

Anadolu Ajansı yazır ki, AK Partiya sözçüsü və partiyanın baş müavini Ömər Çelik sosial media hesabında partiyanın həmişə doğru olanın yanında, yanlışın qarşısında olduğunu qeyd edib.

Çelik fond böhranı ilə bağlı məsələlərin partiyanın səlahiyyətli qurumları tərəfindən diqqətlə izlənildiyini deyib. O, partiya liderinin "Hesab verməli olan hər kəsə hesab sorulacaq" prinsipini əsas tutduğunu vurğulayıb.

Fond böhranından zərər çəkən vətəndaşların hüquqlarının qorunmasının vacib olduğunu bildirən Çelik maliyyə sistemində və Türkiyə iqtisadiyyatında mövcud hər hansı sistemik riskin olmadığını qeyd edib.

O, prezidenti Rəcəb Tayyib Ərdoğanın göstərişi ilə ədliyyə və maliyyə naziliklərinin tam koordinasiyada geniş araşdırmalar apardığını diqqətə çatdırıb. Bütün qanunsuzluqların üzə çıxarılacağını və günahkarların hüquq qarşısında cavab verəcəyini bildirib.

Ömər Çelik fondla bağlı yaranan problemin məhdud sayda fondları əhatə etdiyini vurğulayıb. Eyni problemlərin təkrarlanmaması üçün qanuni və inzibati tədbirlərin görüləcəyini qeyd edib.

O, şəffaflıq, yoxlama və hesabatlılıq prinsiplərinin qorunacağını, vətəndaş əmanətlərinə sahib çıxmaqda tərəddüd edilməyəcəyini, partiyanın siyasətinin isə yanlışlarla qəti mübarizə olduğunu bildirib.