Moldovanın torpağında naməlum dron partladı

Ukrainskaya Pravda yazır ki, oktyabrın 11-də Moldovanın ərazisində naməlum pilotsuz uçuş aparatı (dron) aşaraq partlayıb.

Hadisə zamanı dronun partladığı səsləri Cəməna və Veratik kəndlərinin sakinləri eşidib.

Dron Cəməna kəndinin kənarında meşə ərazisində düşüb. Təxminən saat 22:20-də polisə məlumat daxil olub, hadisə yerinə hərbi və sapyor qruplar yollanıb.

Hadisə zamanı xəsarət alan olmayıb. Dronun düşdüyü ərazi mühasirəyə alınıb, mütəxəssislər obyektin səbəblərini araşdırırlar.

Hüquq-mühafizə orqanları vətəndaşları şübhəli qalıqların yaxınlığına getməməyə, onlara toxunmamağa və araşdırmalar bitənədək həmin ərazidən uzaq durmağa çağırıblar.

Qeyd edək ki, Moldova hakimiyyəti Ukrayna ilə sərhəd postlarında dron hücumlarından qorunmaq üçün mühafizə zonaları yaradır. Oktyabrın 5-də "Palanka – Mayak – Udobnoye" sərhəd postunda Rusiya tərəfindən Ukrayna infrastrukturuna edilən mərmi hücumları nəticəsində sərnişin avtobusuna və dispetçer kabinetinə zərbə dəyib, buna görə də postun fəaliyyəti dayandırılıb.