Medvedev Rusiyada biometrik nəzarəti sürətləndirməyi tələb etdi

News.ru yazır ki, Rusiya Təhlükəsizlik Şurasının sədr müavini Dmitri Medvedev miqrasiya siyasəti komissiyasının iclasında ölkənin bütün keçid məntəqələrində miqrantların biometrik nəzarətinin sürətlə tətbiq olunmasını təklif edib.

Moskva meri Sergey Sobyanin Rusiya sərhədlərində miqrantların hərəkətinin daha yaxşı idarə edilməsi üçün vahid rejimin vacibliyini vurğulayıb. Rusiya Baş nazirinin müavini Tatiana Qolikova isə 2030-cu ilədək bütün keçid məntəqələrinin biometrik nəzarət sistemləri ilə təchiz olunacağını dəqiqləşdirib.

Medvedev Sobyaninin fikirlərini dəstəkləyərək, sərhədlərdə fərqli nəzarət rejimlərinin mövcudluğunun effektliyi azaldacağını bildirib.

Bundan əvvəl Rusiya hökumətinə biometrik verilənlərin şübhəlilər, ittiham olunanlar və məhkum edilənlər razılığı olmadan işlənməsini nəzərdə tutan qanun layihəsi təqdim olunub. Bu sənəd yaxın zamanda hökumət iclasında müzakirə ediləcək.

Rusiya Daxili İşlər Nazirliyinin rəhbəri Vladimir Kolokoltsev bildirib ki, biometrik identifikasiya sistemi sayəsində təxminən 60 min xaricinin ölkəyə girişinə qadağa qoyulub. O, bu sistemlərin sərhəd keçid məntəqələrində şəxsiyyət məlumatlarının toplanmasında fəal tətbiq olunduğunu qeyd edib.