Məcnun Məmmədov: "Ağdamda aqrar fəaliyyətin canlandırılması üçün yeni imkanlar yaradılır"

Yeniliklərdən dərhal xəbərdar olun!

Ağdamda aqrar fəaliyyətin canlandırılması üçün yeni imkanlar yaradılır.

"Report"un Ağdama ezam olunmuş əməkdaşı xəbər verir ki, bunu kənd təsərrüfatı naziri Məcnun Məmmədov bu rayonda keçirilən 100-cü Yubiley Aqrar Biznes Festivalı çərçivəsində təşkil olunmuş "Aqrar sahədə dövlətin dəstək mexanizmləri" mövzusunda panel müzakirəsində bildirib.

Onun sözlərinə görə, torpaqdan səmərəli istifadə, müasir texnologiyaların tətbiqi, yeni təsərrüfatların yaradılması, həmçinin istehsal potensialının artırılması qarşıdakı dövrün əsas istiqamətlərindəndir: "Ağdamın Kəngərli, Sarıcalı və Xındırıstan kəndlərində kənd təsərrüfatı təyinatlı torpaqların əkin məqsədilə istifadəyə verilməsi istiqamətində görülən işlər bu prosesin mühüm tərkib hissəsidir. Bu baxımdan, 100-cü festivalın Ağdamda keçirilməsi regionda aqrar fəaliyyətin canlandırılması, fermer və sahibkarlar arasında yeni əməkdaşlıq imkanlarının yaradılması baxımından əlamətdar hadisədir".