Litva Rusiya təhdidlərini psixoloji təzyiq hesab edir

Ukrainskaya Pravda yazır ki, Litva prezidenti köməkçisi Deyvidas Matulyonis Rusiya tərəfindən Kalininqrad vilayəti ilə bağlı NATO ölkələrinə yönələn yeni təhdidləri əsassız sayıb və onları psixoloji təzyiq kimi qiymətləndirib.

O, bildirib ki, Rusiya Ukraynaya qarşı təcavüzə başladığı ilk gündən NATO üzvlərini parçalamağa, Ukrayna üçün dəstəyi dayandırmağa çalışır.

Matulyonis hər hansı güc tətbiqini və ritorikada eskalasiyanı qətiyyətlə pisləyib. Onun sözlərinə görə, Litva Ukraynaya dəstəyini sona qədər davam etdirəcək.

Litvanın prezident köməkçisi vurğulayıb ki, NATO müdafiə alyansıdır və Rusiya və digər ölkələr üçün heç bir təhlükə yaratmır. Litva isə Kalininqrad vilayətinə tranzitlə bağlı öhdəliklərini yerinə yetirir.

Bu açıqlama Rusiya səfirliyinin Belçikadakı nümayəndəliyinin Kremlin Kalininqradı izolyasiya etməyə cəhd edən NATO ölkələrinə qarşı mümkün genişmiqyaslı hərbi cavab hazırlığı haqda bəyanatından sonra verilib.

Rusiya səfirliyi bildirib ki, Kremlin arsenalı mövcuddur və əgər NATO Kalininqradı ölkənin qalan hissəsindən ayırmağa çalışsa, bütün silah gücündən istifadə etməyə hazırdır.

NATO isə Belçikadakı səfirlik vasitəsilə belə bir sənəd aldığını təsdiqləyib və səsləndirilən nüvə təhdidlərini pisləyib, Rusiyanı Ukrayna müharibəsini dayandırmağa çağırıb.

Polşa xarici işlər naziri Radoslav Sikorski Kalininqrad yaxınlığında hərbi təlimlərin artırılmasının zəruri olduğunu bildirib.

Avqust sonunda Polşaya Cənubi Koreya istehsalı olan 28 ədəd K2 tankı gətirilib və onlar Kalininqrad sərhədinə yaxın ərazilərə yerləşdiriləcək.