Kipr polisi Roman Abramoviçin maliyyə işlərini araşdırır

Rusiyalı milyarder Roman Abramoviç - vəkilləri onun sərvətini gizlətdiyini inkar edib.

Kipr polisi BBC Panorama-nın hesabatından sonra Roman Abramoviçin maliyyə işləri üzrə araşdırma açıb. Hesabatda "Deloitte" mühasibat şirkətinin sənədləri saxtalaşdırmaqla sərvəti gizlətməyə və vergidən yayınmağa kömək etdiyi göstərilib.

Bu ayın əvvəlində BBC və Araşdırıcı Jurnalistika Bürosunun birgə hesabatında Abramoviçinin bəzi peşəkar müşavirlərinin etibarlılığı ilə bağlı ciddi suallar qaldırılıb.

Kipr Ədliyyə Nazirliyinin rəsmisi bu həftə deputatlara bildirib ki, hesabatın nəticələri polis Maliyyə Kəşfiyyat İdarəsinin yeni araşdırması çərçivəsində yoxlanacaq.

Abramoviçinin vəkilləri onun vergi ödəməkdən yayınmadığını və sərvətini gizlətdiyini inkar edib. "Deloitte Kipr" bildirib ki, onlar "müvafiq qanunlara uyğun fəaliyyət göstərirlər".

Polis araşdırması Kipr paytaxtı Nikosiya şəhərində keçirilən müzakirədə elan olunub. Müzakirə pul yuyulmasına qarşı mübarizə və qarşısının alınması barədə olub.

Ədliyyə Nazirliyinin rəsmisi deputatlara bildirib ki, polis hər hansı cinayət halının olub-olmadığını müəyyən etməyə çalışacaq.

Keçən həftə BBC və Araşdırıcı Jurnalistika Bürosunun hesabatında göstərilib ki, 2006-cı ildə Kiprdə "Deloitte" tərəfindən təsdiqlənmiş hesabatlara görə, superyatlar, iqamətlər və şəxsi təyyarələr kimi 672 milyon dollar dəyərində aktivlər Abramoviçinin şirkət hesablarından yoxa çıxıb.

Dünyanın ən böyük mühasibat şirkəti olan "Deloitte" həmçinin oligarkın sərvəti ilə bağlı böyük vergi borcundan yayınmaq üçün sənədlərin saxtalaşdırılması sxeminə məsləhət vermiş kimi görünür.

"Deloitte Kipr" Abramoviçinin şirkətinə vergi yayındırma sxeminə dair məsləhət verib.

Sübutlar arasında 1995-2022-ci illərdə Kiprdən idarə olunan Abramoviçinin maliyyəsi və offshore şirkətlər şəbəkəsinə aid minlərlə sənəd yer alır.

BBC və TBIJ daxil olmaqla media tərəfdaşları 2023-cü ildən bəri Beynəlxalq Araşdırıcı Jurnalistlər Konsorsiumunun "Kipr Konfidensial" araşdırmasının bir hissəsi olaraq sənədlərdəki məlumatları yayımlayır.

Kipr polisinin nümayəndəsi Andreas Anastasiades deputatlara bildirib ki, Maliyyə Cinayətləri İdarəsi artıq sübutlar toplamağa başlayıb və araşdırmanın bir neçə ay çəkəcəyi gözlənilir.

BBC-nin sorğusuna cavab olaraq Andreas Anastasiades deyib: "Hər hansı şirkət və ya şəxs iştirakı varsa, araşdıracağıq."

O əlavə edib: "Saxtakarlıq olub-olmadığını və sənədlərin manipulyasiya olunub-olunmadığını yoxlayacağıq."

Abramoviçinin vəkilləri "Panorama"nın milyarderin sənədlərin saxtalaşdırılmasını bildiyi, icazə verdiyi və ya idarə etdiyi barədə heç bir sübut təqdim etmədiyini deyir. Onlar həmçinin onun şirkətlərinin peşəkar məsləhətə əsaslanmasının qanuni olduğunu bildirir.

"Deloitte Kipr" 20 ildən çox köhnə sənədlər mövcud olmadığı üçün şərh verə bilməyəcəyini açıqlayıb.

BBC və TBIJ bundan əvvəl Abramoviçinin yaxtalarının istismar xərclərindən milyonlarla vergi yayındırmasına imkan verən vergi sxemi barədə məlumat yayıb.

Həmin hesabatdan sonra iki sabiq şirkət direktoru barəsində 25 milyon avro ödənilməyən ƏDV ilə bağlı ittiham irəli sürülüb və onlar gələn ay Kiprdə mühakimə olunacaq.

Abramoviçinin vəkilləri BBC-yə bildiriblər ki, o "həmişə müstəqil peşəkar vergi və hüquqi məsləhət alıb" və ona uyğun davranıb.