Beynəlxalq Enerji Agentliyinin rəhbəri enerji böhranının 2027-ci ilə qədər davam edəcəyini gözləyir

Beynəlxalq Enerji Agentliyinin İcraçı Direktoru Fatih Birol

Beynəlxalq Enerji Agentliyinin İcraçı Direktoru Fatih Birol oktyabrın 23-də enerji böhranının 2027-ci ilə qədər davam edəcəyini gözlədiyini bildirib. O xəbərdarlıq edib ki, hökumətlər alternativ enerji mənbələri axtararkən və təchizat təhlükəsizliyini gücləndirərkən dünya hələ də böhranın nəticələri ilə mübarizə aparacaq.

İstanbuldakı COP31-yə doğru İnvestisiya Sammitində məsafədən çıxış edən Birol deyib ki, dünya üzrə hadisələr və ölkələrin enerji siyasətləri gələn il normallaşma üçün az əsas yaradır.

O bildirib: “2027-ci ildə normallaşma barədə optimist deyiləm. Optimist baxmağa çalışanda belə məni inandıran arqument tapa bilmirəm.”

“Bu böhran 2027-ci ildə də bir formada davam edəcək. Dünya yenə yaranan problemlərini aradan qaldırmağa çalışacaq, təbii ki, yeni problemlər yaranmasa,” – o əlavə edib.

Birol Hürmüz boğazındakı böhranın iqtisadiyyata, kənd təsərrüfatına və enerji sektoruna təsir etdiyini deyib. Bu da hökumətlərin, şirkətlərin və sərmayədarların qısa və uzun müddətli strategiyalarını yenidən gözdən keçirməsinə səbəb olur.

O 1973 və 1979-cu illərin neft böhranları ilə paralel aparıb. Birol bildirib ki, həmin vaxtlar nüvə enerjisinin inkişafı və avtomobillərin səmərəliliyinin artırılması təşviq olunub.

Birol COP31-i Türkiyə üçün “qızıl fürsət” və dünya üçün böyük imkan sayıb. O düşünür ki, mövcud böhran konkret nəticələrin əldə olunması üçün dəstək yarada bilər.

Birol 2035-ci ilə qədər qlobal enerjidə elektrik enerjisinin payının 23 faizdən 35 faizə yüksəldilməsi ilə bağlı təklif olunmuş öhdəlik barədə danışıb. Ölkələrdən Antaliya sammitində bu sənədi imzalamaq tövsiyə olunur.

O əlavə edib ki, daha geniş elektrikləşmə enerji təhlükəsizliyini gücləndirər və emissiyaları azaldar. Bu həm də beynəlxalq ixtilafların dərin olduğu zamanda ortaq məqsəd olar.

Öhdəliklərin qəbul olunması sərmayədarlar və kapital bazarlarına aydın siqnal göndərəcək, deyə o vurğulayıb.

Birol sammitə iştirakı səviyyəsi və elektrikləşmə barədə razılığın COP31-in uğurunun iki əsas göstəricisi olacağını deyib. O həm iştirak edən hökumətlərin sayına, həm də onların təmsilçiliyinin səviyyəsinə görə nikbinliyini bildirib.