Kazasker Mustafa İzzet Efendiyə həsr olunmuş sərgi açıldı

Anadolu Ajansı yazır ki, Türkiyə Yazma Əsərlər Qurumu tərəfindən təşkil olunan “Vefatının 150. İlində Hattın Efendisi: Kazasker Mustafa İzzet Efendi” sərgisi İstanbulun Rami Kitabxanasında açılıb.

Açılış mərasimi Ayasofya Cümə Məscidinin imam hatibi Ferruh Muştuerin Quran tilavəti ilə başlayıb. Tədbirdə İstanbul valisi Davut Gül, Mədəniyyət və Turizm nazirinin müavini Coşkun Yılmaz, Eyüpsultan qeydiyyat rəisi Arslan Yurt, AK Partiyasının İstanbul Mədəniyyət və İncəsənət siyasəti şöbəsinin sədri Helin Görgülü, habelə yazıçılar Beşir Ayvazoğlu, Mehmed Özçay, Uğur Derman və Çiçək Derman iştirak edib.

Sərgidə Kazasker Mustafa İzzetin bestələrinin səsləndiyi musiqi proqramı keçirilib. Rebab, qanun, ney, tambur, dəyrə və dəf kimi musiqi alətləri müşayiəti ilə beş əsər ifa olunub.

Coşkun Yılmaz tədbirdə Kazasker Mustafa İzzetin 19-cu əsrdə yaşamış böyük xəttat, musiqi bilicisi, alim və dövlət xadimi olduğunu vurğulayıb. O, bu şəxsin Ayasofya ilə bağlı xüsusi yer tutduğunu qeyd edib. Yılmaz həmçinin Mustafa İzzetin 13 yaşında Sultan II Mahmudun diqqətini çəkərək saraya alındığını bildirib. Onun saray həyatından bezərək Həccə getdiyi, daha sonra geri döndüyü də tədbirdə vurğulanıb.

İstanbul valisi Davut Gül sərginin ev sahibliyindən məmnun olduğunu bildirib və Kazasker Mustafa İzzetin əsərlərinin zamanın sınağından çıxdığını vurğulayıb. O, sərgidə iştirak edənlərə təşəkkürünü çatdırıb.

Sərgi iki ay müddətində Rami Kitabxanasındakı TÜYEK sərgi salonunda hər gün 09:00-dan 18:00-dək ziyarətçilər üçün açıq olacaq.