İsveçrə vətəndaşları sərt neytrallıq təklifini rədd etdi

Deutsche Welle yazır ki, İsveçrədə keçirilən referendumda vətəndaşların 71 faizi ölkənin neytrallığının sərtləşdirilməsinə qarşı səs verib. 29 faiz isə tələblərin qəbuluna dəstək göstərib.

Neytrallıq prinsipi İsveçrədə 1815-ci ildən bəridir tanınır və 1848-ci ildən ölkə konstitusiyasına daxil edilib, lakin hökumətin neytrallığı necə tətbiq etməsi dəqiq müəyyənləşməyib.

Referendum təşəbbüsünü Pro Schweiz adlı sağçı təşkilat, həmçinin sağ-populist İsveçrə Xalq Partiyası ilə əlaqələri olan qrup irəli sürüb. Onlar ölkənin Rusiya ilə Ukrayna müharibəsi zamanı Avropa İttifaqı və NATO-ya çox yaxınlaşdığını iddia edir.

Pro Schweiz qrupu İsveçrənin neytrallığının "daimi və istisnasız" tətbiq edilməsini, müdafiə qabiliyyətinə malik ordu saxlamasını, üçüncü tərəflər arasındakı qarşıdurmalara qarışmamasını və müdafiə alyansına yalnız hücum olunarsa daxil olmasını istəyirdi. Eyni zamanda BMT-nin hər hansı sanksiyanı təsdiqləməsi tələb olunurdu.

Referendumdan əvvəl aparılan sorğuda respondentlərin 63 faizi təşəbbüsə qarşı olduğunu, 34 faizi isə dəstək verdiyini bildirib. Milli siyasi partiyaların çoxu təşəbbürün əleyhinə çıxıb, yeganə dəstəyini İsveçrə Xalq Partiyası göstərib.

İsveçrə Xarici İşlər Naziri İqnazio Kassis bildirib ki, neytrallıq məsələsində müəyyən dərəcədə elastiklik saxlanmalıdır, müasir dünyada ölkə neytrallığı bəhanə edərək cinayətkarlarla qurbanları bərabər tutmamalıdır.