İstanbulda Kirayə Sosial Mənzillərin nümunələri təqdim olundu

Anadolu Agentliyi yazır ki, Çevrə, Şəhərsalma və İqlim Dəyişikliyi Nazirliyi Toplu Mənzil İdarəsinin (TOKİ) "Kirayə Sosial Mənzil Layihəsi" çərçivəsində İstanbulda tikiləcək sosial mənzillərin nümunə mənzilləri Ataşehirdə təqdim olunub.

Nümunə mənzillər TOKİ tərəfindən Ataşehirdə, Necip Fazıl Bulvarında 1+1 və 3+1 olmaqla inşa edilib. Layihə Prezident Rəcəb Tayyib Ərdoğan tərəfindən 7 sentyabrda elan edilib, detalı isə 10 sentyabrda nazir Murad Kurum açıqlayıb.

Kirayə mənzillərə müraciətlər 25 sentyabrda başa çatıb və müraciət üçün vətəndaşlardan heç bir ödəniş alınmayıb. Müraciətlər yalnız e-Devlet platforması üzərindən, Toplu Mənzil İdarəsinin "Mənzil/Biznes Müraciəti" xidmət bölməsindən həyata keçirilib.

Layihəyə uyğun olaraq evlər 3 il müddətinə kirayə verilir və bu müddət başa çatdıqdan sonra yeni hüquq sahibləri yenidən qurayla müəyyən ediləcək.

Evli, 18 yaşını tamamlamış, Türkiyə vətəndaşı olan, aylıq ailə gəliri 100 min liradan az olan şəxslər bu imkandan yararlana bilər. Müraciət edən şəxsin ən azı 1 il İstanbulda yaşaması və adına qeydiyyatda olan mənzilinin olmaması tələb olunur.

Kirayə mənzillər Ataşehir, Sancaktepe, Ümraniyə, Üsküdar, Maltepe, Tuzla, Kartal, Başakşehir, Qaziosmanpaşa, Beyoğlu, Güngörən və Arnavutköy rayonlarında yerləşəcək. 1+1 mənzillərin qiyməti 10 min liradan, 2+1 mənzillərin 12 min liradan, 3+1 mənzillərin 15 min liradan, 4+1 mənzillərin isə 18 min liradan başlayır.

Layihə çərçivəsində hazır vəziyyətə gətirilən ilk 1 071 mənzil oktyabr ayında təhvil veriləcək. Vətəndaşlar layihə ilə bağlı bütün məlumatları "toki.gov.tr" və xüsusi yaradılmış "talep.toki.gov.tr/tahsisprojesi/" saytından əldə edə bilər.