İsrail Gazze hücumları ilə atəşkəsi pozur

Anadolu Ajansı yazır ki, İsrail ordusu təxminən bir il əvvəl qüvvəyə minən atəşkəsə baxmayaraq, Gazze Şərqinə hücumlarını davam etdirir.

Son hücumda İsrail ordusu Gazze şəhərində bir evi havadan bombalayıb. Nəticədə Filistinli qadın İman Abdülal həlak olub, onun əri ağır yaralanıb.

Gazze şəhərinin şərqində yerləşən Şucaiyyə bölgəsində isə İsrail hərbi təyyarələri iki evi hədəf alıb. Hücumda üç Filistinli yaralanaraq xəstəxanaya yerləşdirilib.

Həmçinin, İsrail ordusuna aid pilotsuz uçuş aparatı orta Gazze yaxınlığındakı Bureyc qaçqın düşərgəsinin şərqində partlayıcı qurğu yerləşdirib. Hərbi nəqliyyat vasitələri isə düşərgənin şərqindəki evlərə qarşı atəş açıb.

Han Yunusun cənubundakı Kizan Ebu Raşvan bölgəsində İsrail hərbçilərinin açdığı atəş nəticəsində bir Filistinli qadın çiynindən yaralanıb.

İsrail 10 oktyabr 2025-ci ildə qüvvəyə minən atəşkəsə zidd olaraq, 1422 Filistinlini qətlə yetirib, 4 min 996 nəfəri yaralayıb. 2023-cü ilin oktyabrından etibarən isə 74 mindən çox Filistinli həyatını itirib, 175 mindən çoxu yaralanıb. Bu hücumlar nəticəsində Gazze infrastrukturunun təxminən 90 faizi dağılıb.