İlkay Gündoğana 2025 Mevlüde Genç Madalyası verildi

Anadolu Ajansı yazır ki, Galatasaray-ın türkdilli alman futbolçusu İlkay Gündoğan 2025 Mevlüde Genç Madalyası ilə təltif olunub. Madalya, 1993-cü ildə Solingen şəhərində neonasistlərin evini yandırması nəticəsində iki qızını, iki nəvəsini və bir qohumunu itirən və barış fəalı olan Mevlüde Genç-in adını daşıyır.

İlkay Gündoğan irqçilik, nifrət və kənara atılmaya qarşı mövqeyi ilə gənclərə nümunə olduğu üçün mükafatlandırılıb. Təqdimat mərasimi Almaniya səfirliyinin Tarabya bölgəsində keçirilib, təntənəli tədbirdə NRW Baş naziri Hendrik Vüst, Almaniya səfiri Sibylle Katharina Sorg, İstanbul Baş konsulu Regine Grienberger və klub rəsmiləri, habelə Gündoğanın həmkarları iştirak edib.

İlkay müsahibəsində bu mükafatı almağı böyük şərəf saydığını bildirib və özünü təkcə futbolçu kimi deyil, nümunəvi insan kimi də görmək istədiyini deyib. O, məsuliyyətini dərk etdiyini və birgə yaşamağın əhəmiyyətini vurğulayıb.

NRW Baş naziri Hendrik Vüst isə Solingen faciəsində böyük itki yaşamış Mevlüde Genç-in bütün dünya üçün rol modeli olduğunu vurğulayıb. Vüst qeyd edib ki, Gündoğanın karyerası yalnız istedad və zəhmətlə yüksəlişi göstərmir, həm də irqçilik və ayrı-seçkiliyə qarşı mübarizədə nümunədir.

Vüst, futbol stadionlarında da irqçilik və ayrı-seçkiliyin mövcud olduğunu, amma Gündoğanın buna qarşı dayanaraq gənclər üçün əhəmiyyətli bir rol model olduğunu söyləyib. O, 2018-ci ildə təsis edilən Mevlüde Genç Medalının xatirəni yaşatmaq və eyni dəyərləri təbliğ etmək məqsədilə təqdim olunduğunu əlavə edib.