Güney Afrikada üç silahlı hücumda 31 nəfər öldü

Anadolu Ajansı yazır ki, Güney Afrikada Gauteng vilayətinin Carletonville şəhəri yaxınlığındakı Wedela bölgəsində 8 hücumçu uzun namlulu silahlar və tapançalarla əyləncə məkanına atəş açıb. Bu hücumda 17 nəfər ölüb, 15 nəfər yaralanıb. Polis hücumçuların bəzi müştərilərin mobil telefonlarını ələ keçirdiyini və hadisə yerindən iki avtomobillə qaçdıqlarını bildirib.

Digər bir hücum Western Cape vilayətinin Cape Town şəhərində baş verib. Səhər saatlarında silahlı şəxslər yemək və içki xidməti göstərilən əyləncə obyektini basaraq müştərilərə atəş açıblar. Beş nəfər hadisə yerində, beş nəfər isə xəstəxanada ölüb, 11 nəfərin müalicəsi davam edir.

Western Cape Polis Komissarı Sizakhele Dyantyi hücumçuların məkan daxilində insanlara təsadüfi atəş açdıqlarını deyib. O, hadisənin araşdırılması üçün ağır və təşkilatlanmış cinayətlər şöbəsindən detektivlərin daxil olduğu xüsusi qrupun yaradıldığını bildirib. Polis hücumun səbəblərindən birinin biznes arasında rəqabət ola biləcəyini nəzərdən keçirir.

Eyni gündə Cape Town şəhərinin Khayelitsha bölgəsində avtomobilə edilən silahlı hücumda da dörd nəfər – üçü hadisə yerində, biri isə xəstəxanada ölüb.

Güney Afrika Cinayət Polisinin məlumatına görə, ölkədə 2025-2026-cı illərdə 23 min 96 nəfər qətl nəticəsində həyatını itirib. 2026-cı ilin aprel-iyun dövründə isə 5 min 427 cinayət hadisəsi qeydə alınıb.

Mayın 30-dan bəri ən azı 12 kütləvi silahlı hücumda 83 nəfər ölüb. Ümumilikdə, Güney Afrika cinayətlərin və qətllərin ən çox baş verdiyi ölkələrdəndir.