Estoniya pasport üz qabığının rəngini dəyişməyə çalışır

Estoniya Daxili İşlər Nazirliyi əcnəbi pasportların üz qabığını mavi rəngə qaytarmağı təklif edir. Ancaq müxalifət hesab edir ki, Rusiya yönümlü miqrasiya və hibrid hücumlar şəraitində daha vacib məsələlər var.

Bu barədə "Avropa Həqiqəti" yazır, ERR xəbər verir.

Hazırlanmış qanun layihəsinə görə, 2030-cu ildən etibarən Estoniya vətəndaşlarının xaricdə istifadə etdiyi pasportların üz qabığı yenidən mavi olacaq. Bundan başqa, gələn ildən həm vətəndaşların, həm də əcnəbilərin pasportlarının qorunma elementləri yenilənəcək.

Daxili İşlər Nazirliyinin rəhbəri İqor Taro deyib ki, pasportların yeni dizaynı hazırlanarkən üz qabığının rəngini dəyişmək fikri yaranıb.

"Estoniya pasportu dövlətlə vətəndaş arasında beynəlxalq əlaqəni göstərən simvoldur və səyahət zamanı əsas şəxsiyyət vəsiqəsidir. Ona görə onun görünüşü Estoniya dövlətinə aid rəngləri əks etdirməlidir", – Taro bildirib.

Nazir vurğulayıb ki, mövcud pasportlar öz etibarlılıq müddətinə qədər istifadə olunacaq.

Keçmiş nazir, müxalif Sosial-Demokrat Partiyasının lideri Lauri Lyanemets Postimees-ə müsahibəsində Taronun ideyasını tənqid edib.

"Rusiya tərəfindən hibrid hücumların qarşısını almağa, polis və Qurtarma İdarəsinin personalının sayını artırmağa, miqrasiya məsələlərinə daha çox diqqət yetirmək lazımdır. Daxili İşlər Naziri həqiqətən vacib olmayan məsələlərə fokuslanır. Dövlət resurslarını xərcləyəcəyimiz ancaq cəmiyyətə fayda verməyəcək işlərlə məşğul olmaq lazım deyil", – o deyib.

Avropa Parlamentinin deputatı Yuri Ratas da pasportun rəngi ilə bağlı işləri seçki kampaniyasının nümayişi kimi dəyərləndirib.

Estoniyada İkinci Dünya Müharibəsindən əvvəl və müstəqilliyin bərpasından sonra mavi pasportlar verilirdi. 2004-cü ildə, Avropa İttifaqına qoşulduqdan sonra Estoniya bordo rəngli pasportlar təqdim etməyə başladı.

Xatırladaq ki, ötən il Estoniya Rusiya tərəfindən verilən biometrik olmayan xarici pasportları tanımamağa qərar verdi.

Bir neçə il əvvəl isə Estoniya təbii yolla vətəndaşlıq qazanmış, Rusiya tərəfində vuruşanların pasportlarını ləğv etməyə icazə verdi.