Ən zəngin afrikalı Keniyada neft emalı zavodunu işə salacaq

BBC News yazır ki, Lamu sahilində tikiləcək neft emalı zavodu gündə 700 min barrel xam neft emal edəcək və bu, Şərqi Afrikanın ən böyük sənaye layihəsinə çevriləcək.

Layihə, Keniya müstəqillik əldə etdikdən sonra ən böyük infrastruktur layihəsidir və gələcəkdə 60 min iş yerinin yaradılması gözlənilir. Bu isə həm birbaşa, həm də dolayı şəkildə bölgənin iqtisadiyyatına təsir göstərəcək.

Yerli sakinlərin kompensasiya tələbləri ilə bağlı aksiyalar keçirilsə də, Aliko Dangote bu narazılıqları işbazların və beynəlxalq tərəflərin oyunları kimi qiymətləndirərək zavodun 2030-cu ildə istifadəyə veriləcəyini bildirib.

Keniyanın energetika naziri Opiyo Vandayi isə zavodun bölgədən asılı olmayacağını və xam neftin qlobal bazardan alınacağını deyib. Dangote də Sinqapur misalını çəkərək, ölkənin xam neft istehsal etmədən də çox sayda emal zavoduna sahib olduğunu vurğulayıb.

Layihə çərçivəsində 1000 meqavatlıq elektrik stansiyasının da tikilməsi planlaşdırılır. Dangote bu elektrik enerjisinin sənayeləşməni dəstəkləyəcəyini və Afrika üçün vacib məhdudiyyətləri aradan qaldıracağını bildirib.