Donald Tusk Rusiyanın NATO-ya hücumuna hazırlaşdığını deyir

Polşa Baş naziri Donald Tusk bir daha Ukrayna ilə kifayətlənməyəcəyinə inandığını təsdiqləyib və fərqli ssenarilərə hazırlaşdıqlarını deyib.

Bu barədə o, Varşava Təhlükəsizlik Forumunda danışıb, məlumatı “Avropa Həqiqəti” yayıb.

Tusk vurğulayıb ki, Ukraynanın Rusiya təcavüzünə qarşı müdafiəsini zəiflətmək istəyən hər kəs açıq-aydın öz xalqına və onun təhlükəsizliyinə zərbə vurur.

"Rusiya Ukrayna üzərində dominasiya qurmağa çalışır və biz bilirik ki, bu, onun dayanacağı son deyil", – o xəbərdarlıq edib.

Tusk həmçinin Kremlin Avropada mövcud təhlükəsizlik arxitekturasını dağıtmaq və Rusiyanın hökmranlığını 1989-cu ilədək olan vəziyyətə qaytarmaq istədiyini iddia edib.

Nitqi zamanı Baş nazir Tusk NATO-nun Avropadakı Birləşmiş Silahlı Qüvvələrinin komandanı və ABŞ-ın Avropa Qüvvələri Komandanlığının rəhbəri general Aleksus Qrinkevic ilə görüşünü xatırladıb.

"Biz burada, Polşada müxtəlif ssenarilərə hazırlaşır, müdafiəmizə böyük məbləğdə vəsait yatırırıq", – o əminliklə bildirib. Eyni zamanda, generaldan eşitdiklərinin onu nikbinliyə vadar etdiyini əlavə edib.

"Bugünkü çətin dövrlərdə nikbin olmaq çətindir, amma mənə ümid verən qərarlılıq və müxtəlif ssenarilərə hazırlıq səviyyəsidir. Bu söhbətdə mənimlə eyni reallıqları görən, Rusiyanın Ukrayna, eləcə də Avropa və bütün Qərb dünyasına qarşı niyyətləri ilə bağlı heç bir illüziyası olmayan bir nəfər vardı", – o deyib.

Finlandiya Prezidenti Aleksandr Stub bundan əvvəl Rusiyanın dünyanın ən güclü hərbi alyansı olan NATO-ya hücum edə biləcəyindən şübhə bildirmişdi.

Avqustun 29-da Polşa Baş naziri Donald Tusk Şərqi Avropada təhlükəsizlik vəziyyəti və Rusiya-Ukrayna müharibəsi ilə bağlı NATO-nun baş katibi Mark Rütte ilə danışıqlar apardığını bildirib.

Əvvəl isə Tusk Rusiya tərəfindən eskalasiya hazırlığının əlamətlərinin olduğunu deyib və növbəti yeddi-səkkiz ayın Ukrayna, Polşa və bütün region üçün təhlükəsizlik baxımından həlledici ola biləcəyini ehtimal edib.