Donald Tramp Super İntellekt zirvəsini keçirib

BBC News yazır ki, Donald Tramp Vaşinqtondakı Ağ Evdə OpenAI, Anthropic, Nvidia, “Meta” və “Google” daxil olmaqla texnologiya sektorunun əsas rəhbərləri ilə görüş keçirib. Bu görüşdə iştirakçılar süni intellektin təhlükəsizliyini təmin etmək üçün özlərini məhdudlaşdırmağa dair “mənəvi bağlayıcı” sənəd imzalayıblar.

Özünü tənzimləmə sazişi şirkətləri texnologiyalarının təhlükəsizliyinə cavabdeh etməyə və modellərdə yaranan problemləri tez aşkar edib aradan qaldırmağa yönəlib. Həmçinin, şirkətlər “müstəqil auditorlar”la işləyərək sistemlərin gözlənilən kimi işləməsini yoxlayacaqlar. Sazişə Donald Tramp, “Google”un rəhbəri Sundar Piçai, Anthropic-in direktoru Dario Amodei, “Meta”nın Mark Zukerberq, OpenAI prezidenti Qreq Brokman, SpaceX-in sahibi İlon Mask və Nvidia-nın baş direktoru Censon Huanq imza atıblar.

Tramp süni intellekt alətlərinin təhlükəsizliyini izləmək üçün komissiya yaradacağını bildirib, amma komissiyanın tərkibini açıqlamayıb. O, süni intellektin risklərinə dair narahatlıqları “yalan” adlandırıb və yalnız “ağıllı” prezidentin sənayenin ehtiyac duyduğu “qoruyucu tədbirlər”i təmin edə biləcəyini qeyd edib.

Görüşdə həmçinin məlumat mərkəzlərinin sürətli genişlənməsinin dəstəklənməsi vurğulanıb. Məlumat mərkəzlərinin inşasına bəzi icmalar tərəfindən elektrik sərfiyyatı və sosial təsirləri səbəbindən etirazlar var. Tramp bu etirazlara qarşı çıxaraq, texnologiya şirkətlərinin yerlərdə iş yerləri yaradacağını və icmaları dəstəkləyəcəyini söyləyib.

Nvidia-nın baş direktoru Censon Huanq məlumat mərkəzlərini “super intellekt fabrikləri” adlandırıb və bunların ABŞ-ın sənaye sektorunu yenidən canlandırdığını bildirib.

Tramp həmçinin icra əmri imzalayaraq süni intellekt terminologiyasını dəyişib. İndi “süni intellekt” əvəzinə “Super İntellekt” ifadəsi dövlət qurumlarında, rəsmi sənədlərdə və kommunikasiya vasitələrində istifadə olunacaq. O, BMT-də çıxışında “süni” sözünün texnologiyanı saxta kimi səsləndirdiyini demişdi.