Boliviya narkotik qaçaqmalçılığı ilə mübarizə aparmaq üçün ABŞ-la yeni əməkdaşlıq sazişi imzaladığını açıqlayıb.

Xarici işlər nazirliyi bildirir ki, sazişə əsasən, ABŞ narkotik qaçaqmalçılığı ilə mübarizə çərçivəsində Boliviya qüvvələrini təlim və avadanlıqla təmin etmək məqsədilə 20 milyon dollaradək (15 milyon funt sterlinq) vəsait ayıracaq.

Bu razılaşma, 18 il əvvəl keçmiş prezident Evo Moralesin ABŞ Narkotiklərlə Mübarizə İdarəsini ölkədən çıxarmasından sonra münasibətlərin yumşalmasının göstəricisidir. Boliviya kokain istehsalında istifadə olunan kokainin xammalı olan xəmirin üçüncü ən böyük istehsalçısıdır.

Yeni mərkəzçi prezident Rodrigo Pazın rəhbərliyi ilə Boliviya ABŞ-ın Qərb Yarımkürəsindəki təhlükəsizlik təşəbbüsü olan Amerika Qalxanı proqramına qoşulub.

AFP agentliyi xəbər verir ki, ABŞ səfirliyi əməkdaşlığı təsdiqləyərək "Amerika Birləşmiş Ştatları Boliviya hökuməti ilə əməkdaşlıqda təlim, avadanlıq və digər dəstək formalarını təmin edəcək" deyə bildirib. BBC səfirliklə əlaqə saxlayıb.

Boliviyanın xarici işlər nazirliyi qeyd edir ki, sazişin məqsədi ictimai təhlükəsizlik, cinayət araşdırmaları və təşkilatlanmış cinayətkarlığa qarşı mübarizə üzrə məsul olan Boliviya qurumlarını gücləndirməkdir.

Saziş La Pazda ölkə prezidentinin "narkotik rəhbəri" Ernesto Justinianonu müdafiə naziri təyin etməsindən azı iki həftə sonra imzalanıb.

Mart ayında Paz ABŞ prezidenti Donald Trampın ev sahibliyi etdiyi Flordidəki ilk "Amerika Qalxanı" zirvə toplantısında digər 12 regional liderlə birgə iştirak edib.

Hazırkı ittifaq üzv ölkələri son həftələrdə anti-hökumət etirazlarına qarşı mübarizədə Pazı dəstəkləyib.

21 mayda onlar birgə bəyanat verib və "Boliviya hökumətinin yanında olduqlarını" bildirərək "konstitusiya qaydasını pozmağa və demokratik yolla seçilmiş hökuməti çaşdırmağa yönəlmiş etirazlar və yol bağlamalara dərin narahatlıqlarını ifadə ediblər".

▶︎ Baxa bilərsiniz: Boliviyada anti-hökumət etirazçıları ilə polis arasında toqquşma (BBC video)

Lakin koalisiyanın əsas hədəfi "narko-terrorizm"lə mübarizədir.

Tramp ABŞ-a narkotik vasitələrinin çatdırılmaması məqsədi ilə ABŞ qüvvələrinə qanunsuz maddələrin qaçaqmalçılığında şübhəli gəmləri hədəfləməyi tapşırıb.

Sentyabrın əvvəlindən Karib və Sakit okeanda ABŞ hücumlarında 200-dən çox şəxs həyatını itirib. Bəzi hüquqşünaslar bu hücumların beynəlxalq qanunları pozduğunu söyləyirlər.

ABŞ Cənub Komandanlığının çərşənbə axşamı baş verdiyini açıqladığı ən son hücumda gəmidə bir nəfər ölüb, iki nəfər sağ qalıb.

Southcom bildirib ki, "kəşfiyyat məlumatları gəminin narko-qaçaqmalçılıq əməliyyatlarında iştirak etdiyini təsdiqləyib", lakin bununla bağlı ictimaiyə sübut təqdim etməyib.