Baltimorda park yeri mübahisəsi 12 yaşlı qızın ölümünə səbəb oldu

Ukrainskaya Pravda yazır ki, ABŞ-ın Baltimor şəhərində park yeri üstündə yaranan atışmada 12 yaşlı qız həlak olub, üç nəfər isə yaralanıb.

Polisin rəisi Riçard Uorli bildirib ki, polis iki silahlı şəxsi axtarır. Hadisənin baş verdiyi Lion Dey parkı yaxınlığında müxtəlif tipli iki silahdan atılmış patron qəlpələri tapılıb.

Uorli deyib ki, mübahisə mənasız park yeri üstündə yaranıb. Atışma zamanı 12 yaşlı qız güllələnib. O, gənclər arasında keçirilən futbol oyununu izləmək üçün oraya gəlmişdi.

25 yaşlı qadın və 23 və 28 yaşlı iki kişi də yaralanıb. Polisin məlumatına görə, onların vəziyyəti həyati təhlükə yaratmır.

Baltimor meri Brendon Skott qeyd edib ki, iki kişi arasında yaranmış mübahisə faciə ilə nəticələnib və 12 yaşlı qız həlak olub.

Əvvəlki hadisəyə nəzər salsaq, 2024-cü ilin avqustunda Baltimorun şərqində baş verən başqa bir genişmiqyaslı atışmada da park yeri üstündə münaqişə olmuşdu. O vaxt 36 yaşlı kişi həlak olub, yeddi nəfər yaralanmışdı.