Avstraliyada süni intellekt tərəfindən əsasən və ya tam yaradılan mahnılar musiqi çartlarından xaric edilib.

Bu həftədən etibarən bütün musiqi əsərləri "əsasən insan tərəfindən hazırlanmış" olmalıdır ki, musiqi siyahılarına daxil edilsin.

Avstraliya Qeydiyyat Sənayesi Assosiasiyası (ARIA) açıqlayıb ki, yeni qaydalar "incəsənətin insan təbiətini təşviq etməyə" xidmət edəcək.

Bu qərar Avstraliyalı DJ Coş Fawazın Madonna-nın "Like A Prayer" mahnısının ifası ilə bağlı yaranan mübahisədən sonra qəbul edilib. Məsələni gündəmə gətirən mahnı ARIA rəqs təkli çartında birinciliyə, ümumi çartda isə ikinci yerə yüksəlib.

Mahnı kommersiya radio stansiyalarının ifa siyahılarında yer alıb və təkcə "Spotify" platformasında 48 milyon dəfədən çox dinlənilib.

Fawaz tənqidlərdən sonra mahnıya generativ süni intellektin köməyilə istehsal edildiyi barədə qeyd əlavə edib.

ARIA qeyd edib ki, Avstraliyalı artistlər "tarixin ən sıx bazarında" uğur yarışır və "insan sənəti olmayan, süni intellektlə yaradılan musiqinin təşviqi və ya uğurunun qeyd olunmasında maraqlı deyil".

Yeni qaydalara görə, süni intellekt köməkçi vasitə kimi istifadə oluna bilər, lakin mahnıların insan tərəfindən yazılması, əsas vokal və əsas alətlərin insan tərəfindən ifa olunması vacibdir.

Süni intellekt mahnıların masteringində, baraban maşınlarında və avtomatik tonlama kimi funksiyalarda hələ də tətbiq edilə bilər.

Bu ilin əvvəlində isə İsveç musiqi çartlarından süni intellekt tərəfindən yaradılan başqa bir mahnı qadağan edilib.

İyulda Fonoqrafiya Sənayesi Beynəlxalq Federasiyası (IFPI) Latın Amerikası, Yaxın Şərq, Afrika və Cənub-Şərqi Asiyada rəsmi çartlarda süni intellektlə bağlı qaydaların tətbiqini elan edib.

IFPI-nin göstərişlərinə uyğun olaraq yenilənmiş qaydalar "stream və ya çart manipulyasiyası ilə bağlı şübhələr yaradan" musiqini də istisna edir.

ARIA-nın baş direktoru Annabelle Herd bildirib: “Bu dəyişikliklər sürətlə inkişaf edən sahədə dinamik qalmaq və incəsənətin insan təbiətini qorumaq istəyimizi ifadə edir.”

O əlavə edib ki, "artistlər artıq işlərində süni intellekt vasitələrindən istifadə edir, çartlar buna imkan verməli və inkişaf etməlidir, ancaq bütünlüklə artistlərin ifalarına əsaslanan xidmətlər tərəfindən yaradılan musiqi fərqli məsələdir."

Herd vurğulayıb: "Lisanssız süni intellekt məhsulunun mükafatlandırılması yazılı musiqi sənayemizin əsasını sarsıda bilər."

Artistlər mahnı çartlara təqdim edilərkən süni intellektdən istifadə edildiyini bildirməlidir.

Əgər sonradan məlum olarsa ki, mahnı əsasən süni intellekt vasitəsilə yaradılıb, çart mövqeləri geri qaytarıla və birinci yer tutmuş mahnının qazandığı mükafatların qaytarılması tələb oluna bilər.

Artistlər və onların nümayəndələri çıxarılmaya etiraz edə bilərlər.

Bu təşəbbüsü dəstəkləyən müğənnilər arasında Avstraliyalı elektron musiqi qrupu "Peking Duk" da yer alır.

Qrup keçən ay 2014-cü ilin hiti "High" mahnısının süni intellekt yardımçı versiyasını “Instagram” hesablarında paylaşaraq, "Öz mahnını süni intellektlə yenidən yazdıq ki, Avstraliya radiosu onu çalsın" - deyə yazıb.

Qrup üzvü Adam Hyde "Channel Nine" televiziya kanalının "Today" proqramında süni intellektlə yaradılan musiqinin "insan təcrübəsini həyatdan çıxardığını" söyləyib.

Ötən ilin iyulunda Avstraliya baş naziri Entoni Albanese bildirmişdi ki, "süni intellekt qarşısında ən güclü müdafiə" Avstraliyalı yaradıcılar üçün təmin ediləcək.

Albanese söz verib ki, yazıçılar və musiqiçilər əsərlərinin süni intellekt təlimində istifadə olunmasına nəzarət edəcək və bunun üçün ödəniş alacaqlar. Əks halda, bu, "oğurluq" sayılacaq.