Almaniya Rusiyanın Kiyevdə elmi obyektə zərbəsini qınayıb

Ukrainskaya Pravda yazır ki, Almaniyanın Xarici İşlər Nazirliyi Rusiyanın Kiyevdə Milli Elmlər Akademiyası binasına pilotsuz uçan aparatlarla zərbə vurmasını kəskin şəkildə qınayıb.

Nazirlik xəbər verib ki, bu hücum Almaniya səfirliyinə çox yaxın məsafədə baş verib və bununla Rusiyanın mülki şəxslərin həyatını bilərəkdən təhlükəyə atması göstərilib. Hücum nəticəsində ölən və yaralananlar var.

Nazirlik vurğulayır ki, Almaniya Ukraynaya dəstəyini davam etdirəcək.

Eyni zamanda, Avropa Komissiyasının sədri Ursula fon der Layen Rusiyanın Kiyevdə Milli Elmlər Akademiyasını hədəf seçməsini qınayıb və bildirib ki, "elmi sahə Rusiyanın hədəfinə çevrilib".

Avropa İttifaqının Ukrayna səfiri Katarina Maternova bildirib ki, 28 sentyabrda Rusiyanın pilotsuz təyyarəsi 200 metr aralıda yerləşən Avropa İttifaqı nümayəndəliyi ofisinin yanındakı binaya düşüb. O, Ukraynanın hava hücumundan müdafiə vasitələri üçün əlavə maliyyəyə və Rusiyaya qarşı təzyiqə ehtiyacının olduğunu qeyd edib.